Մտապատրանքի փոթորկում, տեսիլքներ, իրականի և անիրականի միախառնում, երազների մեջ երկխոսություն․․․ Պատգամ, պատմության դրոշմներ ու խորաթափանց միտք․․․ Պատկեր պատկերի ներսում կամ թվացյալ տարածություն սահմաններից դուրս, անվերջ հասունացող նոր տեսարաններ․․․ Գիծ, գույն, աներանգ տարածություն, բայց և անչափ գունեղ… Հույզեր, կիրք, սպասում, շշուկի աղմուկ լռության մեջ և զգացմունքների համատարած պոռթկում։
Էդուարդ Իսաբեկյանի կերպարները ճանաչում ես հազարների միջից, առանձնացնում և անհատական վերաբերմունք ձևավորում. յուրաքանչյուր պատկեր ունի իր պատմությունն ու կուլմինացիան։ Նրա գծանկարները առանձնանում են իրենց ռոմանտիկ հուզականությամբ, որտեղ հստակ երևում է արվեստագետի հախուռն բնավորությունը, սերը կյանքի նկատմամբ՝ բնության և շրջապատող աշխարհի անհորիզոն ընկալումներով։ Նրա գծանկարչական ռիթմերը այնքան խոսուն են, այնքան իրական, որ այն, ինչ չես տեսնի աչքերով, նա ներկայացնում է շատ ավելի հուզական լեզվով և իր գծով արտահայտում է մարդկային հավերժական արժեքներն ու ապրումները։ Նկարիչը լավ ծանոթ է կյանքի դառնությունների տարաձև շերտերին և մարդկային բնավորության խորություններին. ետ մղելով նյութական արժեքները` արվեստի միջոցով նա բացահայտում է ոգեղենի կարևորությունը։ Եվ դա է պատճառը, որ նրա կերպարները համամարդկային են, ազատ ու անկաշկանդ և ունեն յուրատեսակ խորհրդավորություն ու երազանքներ։ Իսաբեկյանի աշխարհը իր հոգու արձագանքն է, որտեղ ապրում են և՛ պատմական, և՛ իրական անհատներ։ Նկարիչը ճանաչում է իր զգացածի կարևորությունը և մեծ վարպետությամբ դիտողին է փոխանցում իր «մոնոլոգը»։
Էդուարդ Իսաբեկյանի ստեղծագործությունները իսկապես մեկուսի աշխարհներ են՝ և՛ կազմությամբ, և՛ պատկերաոճով, և՛ գունային սիմֆոնիայով։ Նրա գրաֆիկայի թեմատիկան բազմաբովանդակ է․ հայրենի պատմության էջեր, դիցաբանություն, գրական գեղարվեստական երկերի նկարազարդումներ, դիմանկարներ․․․ երազներ, կանայք, զգացմունքների հարատև գունապնակ, բնության տարերքներ։ Նկարիչը աշխատել է գրաֆիկական գրեթե բոլոր նյութերով՝ մատիտ, թանաք, սանգինա, կավճամատիտ, ֆլոմաստեր, ածուխ՝ ամենուրեք թողնելով գծի, ռիթմի և ձևի ուրույն ձեռագիր։
Էդուարդ Իսաբեկյանը 20-րդ դարի հայ արվեստի պատմության անքակտելի մասն է, մի ամբողջ դարաշրջանի լուռ վկայությունը, երբեք չընդհատվող գիծը։
Համադրող՝ Օսյա Քարամյան
- Բադալյան Մ. — Ուժ, կամք, պոռթկում: Ցուցահանդես՝ Էդուարդ Իսաբեկյանի գրաֆիկական աշխատանքների — «safa.am», 07.11.2022
- Սարգսյան Է — «Էդուարդ Իսաբեկյանի հարուստ ու բազմազան արվեստը» — «1lurer.am», 09.11.2022
- Համբարձումյան Ա. — «Նկարիչ Էդուարդ Իսաբեկյանի գրաֆիկական աշխատանքների ցուցահանդեսը նորովի կբացահայտի հեղինակի ստեղծագործական աշխարհը» — «armenpress.am», 12.11.2022
- Բադալյան Մ. — Ուժ, կամք, պոռթկում: Ցուցահանդես՝ Էդուարդ Իսաբեկյանի գրաֆիկական աշխատանքների — թերթ, «Ազգ», Ե., 25.11.2022