Էդուարդ Իսաբեկյան Ցուցասրահի հիմքը դրվել է 2004 թվականին, բացումը կատարվել է 2013 թվականին։ Էդուարդ Իսաբեկյանի որդին՝ Արամ Իսաբեկյանը, Երևան քաղաքին է նվիրաբերել Էդուարդ Իսաբեկյանի մշտական ցուցադրությանը ներկայացված գունանկարչական հայտնի կտավներից 28-ը: Էդուարդ Իսաբեկյանի ստեղծագործությունները ցուցադրվում են 1970-ականների վերջին Ջիմ Թորոսյանի եւ Գեւորգ Արամյանի կողմից նախագծված «Կլորներ»-ի շենքի առաջին հարթակում: Ոճային տեսանկյունից շենքը պոստմոդեռնիզմի անցման շրջանի կառույց է: Վերնահարկի շրջանաձև սրահում Իսաբեկյանի էպիկական շնչով մեծածավալ կտավներն են. նկարչի հայացքը պատմության էջերից այսօրվան է փոխանցում ուժի, առնականության, հպարտության ու հաղթանակի անցյալի ոգին։ Էդուարդ Իսաբեկյան Ցուցասրահն ակտիվ մասնակցում է Երևանի մշակութային կյանքին։ Ցուցասրահում կազմակերպվում են միջոցառումներ, դասախոսություններ, հանդիպումներ, գործում է միջազգային «izi.TRAVEL» հավելվածը (անվճար աուդիոգիդ): Այս ամենը միտված է բացահայտելու Էդուարդ Իսաբեկյանին որպես նկարիչ, մանկավարժ, գրող, սրտացավ քաղաքացի և առաջնահերթ՝ հայրենասեր որդի։ Բացման օրվանից ցուցասրահի գործունեությունը ղեկավարում է Իրինա Իսաբեկյանը։
