Մի անգամ կրկին մինչև հոգուս խորքը ջերմության մի հզոր ալիք վերապրեցի` շփվելով իմ սիրելի Վարպետի` Էդուարդ Իսաբեկյանի կենդանի ստեղծագործությունների հետ: Թող հավերժ գույների, պատմական հիշողությունների, հերոսական կերպարների, պարզ և գեղջկական համակրելի դեմքերի թրթիռը թևածի մեր սիրելի հայրենիքի երկնակամարում` նորանոր սերունդներին հաղորդելով ջերմություն, սեր, հավատ հայրենիքի ապագայի և արվեստի հազարամյա ավանդույթների նկատմամբ: Փառքդ շատ, իմ սիրելի Վարպետ: Շնորհավորանքներս քո հրաշալի պատկերասրահի ստեղծման կապակցությամբ, որին դու արժանի էիր դեռ կենդանության օրոք:Սիրով և հարգանքներով` Հովիկ Քոչինյան, 03.02.2015
Անչափ շնորհակալ ենք: Ի.Հ.Ա. Բաղդասարյաններ 03.02.2015
Շնորհակալ ենք ցուցահանդեսի կազմակերպիչներին: Ստացանք մեծ բավականություն: Միշտ սովորելու շատ բան ունենք մեր մեծերից:Մի խումբ կոջոյանցիներ, 06.02.2015
Հաճելի է գիտակցել, որ քաղաքի խառնիճաղանջ բազմազանության մեջ,մոդեռնիզացված «արժեքների» շիլաշփոթում, նոր ձևավորված բարքերի, «առաջադեմ գաղափարների» հենց կենտրոնում կա իսկական բարձր արվեստի մի կղզի, որտեղ հնարավորություն ունես վերագտնելու իսկական նկարագիրդ ու ինքնությունդ, ազգային արժանապատվությունդ ու հպարտությունդ… Տիգրան Բարխանաջյան, 21.02.2015
Այստեղ առաջին անգամ էինք: Շատ տպավորված ենք: Շատ գեղեցիկ և խորիմաստ աշխատանքներ էին:Դավիթ և Ռիտա, 16.05.2015
Հիանալի մտահղացում է մեծ ուսուցչին ցուցադրել իր աշակերտների հետ, որոնք սերում են ուսուցչից և յուրաքանչյուրն ունի իր անհատականությունը:
Վ.Ղազարյան, ՀՀ ԳԱԱ թղթ.անդամ, 16.05.2015
Նկարներում սեր ու տառապանք եմ նկատել…Գ., 16.05.2015
«Հաղպատի գյուղացիների ապստամբությունը» ամենից ավելի հուզեց: Շնորհակալ եմ մեր մեծերից:16.05.2015
Կցանկանայի ավելի շատ նկարներ տեսնել այս պատկերասրահում, քանի որ տաղանդավորը ունի այդ հնարավորությունը, և կուզենայի ավելի խորհրդավոր լուսային էֆեկտներով հարստացնել լուսային ֆոնդը: Շնորհակալություն:16.05.2015
Սիրում եմ պ.Իսաբեկյանի աշխատանքները: Շատ տպավորիչ են: Կարախանյան Թերեզա, Չախոյան Նորա, 16.05.2015
Առաջին անգամ հաճախեցի հիանալի նկարիչ, վրձնի տիրակալ Է.Իսաբեկյանի ցուցահանդեսին: Ցավոք, նկարիչը ֆիզիկապես բացակայում է մեզնից, սակայն նրա ժառանգությունը խոսուն ու հավիտենական է: Զարմանալիորեն կախարդում են բոլոր գործերը թե´ ձևով, թե´ բովանդակությամբ: Ինձ ամենից շատ հուզեց նրա «Կոմիտասը», որտեղ մեծ վարդապետը ասես կենդանի շփման մեջ լինի աշխարհի հետ: Կցանկանայի, որ նոր սերունդը ավելի հաճախ այցելի և ծանոթանա մեծանուն նկարչի գործերին, և ինչու չէ, նաև վարակվի նրա տաղանդով:Շնորհակալություն, բոլոր կազմակերպիչներին, Մ.Աբովյան, 18.05.2015
Լինելով արվեստաբան` առաջին անգամ այցելեցի այստեղ և ստացա բավականին հաճելի տպավորություն: Ինձ միանգամից գրավեց «Իգդիրի երևելիները. թաղում Իգդիրում»: Այն միանգամից խոր հուշեր առաջացրեց իմ մեջ` անցնելով դեպի մի քանի հարյուրամյակներ հետ:«Դավիթ Բեկ»` հիանալի կերպար ոգեշնչելու, ստեղծագործելու և այն մեզ ցուցադրելու: Նայելով նկարներին` հիանալն ու հպարտանալը ինքնըստինքյան առաջանում են:Պատ. ֆակուլտետ, արվեստաբանության 1-ին կուրսի ուսանող Էմիլ Սահրադյան, 19.05.2015
ԵՊՀ Արվեստի պատմության և տեսության ամբիոնի դասախոս` Հռիփսիմե Էդուարդի Վարդանյան, 19.05.2015
Իսաբեկյանն ինձ պարտադրեց մեկ անգամ ևս վստահաբար ասել` մայիսը մեր հաղթանակների ամիսն է: «Ավարայրի ճակատամարտը» կտավը դրա վառ ապացույցն է, քանզի Մամիկոնյանը և իր զինվորները մի սաղավարտ բարձր են հագարացիներից… Սիրով` Ռուզան Չոբանյան, 21.05.2015
Մեծ հաճույքով մասնակցեցի աշակերտների ցուցահանդեսին և ուրախ եմ, որ Էդուարդ Իսաբեկյանը մեր ընտանիքի 3 սերնդի վարպետն է: Սիրով` Սուրեն Խորենյան, 12.06.2015
Բարձրանալիս դեմից երևաց «Ավարայր» նկարը: Մոտեցա ու զգացի, թե այս նկարում ինչքան ցավ կա նկարչի հոգում իր ժողովրդի համար, նրա անպաշտպան, նրա` սարսափ առաջացնող, զորավոր անզորության համար:Ես հպարտանում եմ իմ արարչագործ տաղանդների զգացումներն ապրելուց և կուչ եմ գալիս չնչինների առջև, որոնք չեն հասկանում, որ կան աննմաններ նմանների մեջ:Տղամարդ, առնականություն, կոշտ ինտելեգենտություն, ինչպիսին էին Դավիթն ու Մհերը…Հպարտ եմ կրկին ու միշտ, որ նույն ազգի զավակն եմ Էդուարդ Իսաբեկյանի հետ: Փառք հիշատակիդ` խոսուն ու գունավոր:Ս.Հովհաննիսյան, բանաստեղծ, 13.06.2015
Շատ հետաքրքիր էր, մերսի: Ամերիկայից ենք և չենք լսել այս նկարիչի մասին: Տարոն, 15.06.2015
Վարպետի` Էդուարդ Իսաբեկյանի կյանքի վերջին 30 տարվա ամենօրյա ընկերն եմ եղել: Նա ոչ միայն մեծանուն գեղանկարիչ էր, այլ մեծ մտածող, հայ ժողովրդին մինչև վերջ նվիրված, իրեն նկարչությամբ ամեն օր դա ապացուցող մտավորական էր: Նա լռության և նրա գլխավոր հրաշքի` մարդու սիրահարված գովերգողն էր: Նրա արվեստանոցը մեր մեծերի` Համո Սահյանի, Վահագն Դավթյանի, Պարույր Սևակի, Անտոն Քոչինյանի և նրանց նմանների հավաքատեղին էր: Իմ կյանքում նրա մահից հետո մտավոր, ճաշակի կատարյալ դատարկություն է: Մեր երկրի գեղանկարչության հաղթանակը նրա ծառայությունն է, նրան ենք պարտական գեղեցիկի, հրաշքի ըմբռնման մեջ: Վարպետ, դու ինձ օգնել ես խղճիս հետ հանգիստ, համահունչ ապրել: Շուտով կհանդիպենք: Վարդգես Եղիազարյան, 16.06.2015
Շարունակեք ձեր լավ և գեղեցիկ աշխատանքը: Շատ որակով գործեր գտա ես Իսաբեկյանի գործերի մեջ: Ալեքս Վարդան Նաթանյան, 19.06.2015
Լավագույն մաղթանքներով: Դավիթ Պողոսյան, 19.06.2015
Իգդիրը տեսա... 04.07.2015
Մեծագույն բավականությամբ ու հաճույքով դիտեցի ինձ համար շատ հարազատ ուսուցիչ, սիրելի ու հարգելի անձնավորություն, մեծ նկարիչ ու մանկավարժ, պետական գործիչ արվեստի բնագավառում, պատկերասրահի նախկին տնօրեն, Երևանի պատվավոր քաղաքացի, ժողովրդական նկարիչ Էդուարդ Իսաբեկյանի նկարների ցուցահանդեսը: Նկարները բազմաժանր են և գունագեղ, կատարված են վարպետորեն և հնչեղականորեն: Իսաբեկյանը հայ պատմանկարչության մեծամեծերից է: Ես պարծենում եմ, որ Իսաբեկյանի նման ուսուցիչ և ավագ ընկեր եմ ունեցել:Մարտիրոս Պետրոսյան, գեղանկարիչ, 22.07.2015
Իմ սիրելի Իռեն, անսահման ուրախ եմ, որ մեծ վարպետի ցուցահանդեսը դիտելիս քեզ վերգտա: Վ.Ենգիբարյան, 22.07.2015
Շնորհիվ Է.Իսաբեկյանի կտավների իմ ստեղծագործական կյանքում զգացի դրական փոփոխություններ: Նրա ստեղծագործությունները թեպետ մռայլ, բայց և միևնույն ժամանակ հոգևոր լույս են արձակում և ստիպում լինել ավելի հայրենասեր ու նկատող կյանքի փակված էջերը:31.07.2015
Գեղեցիկ և շատ հիանալի նկարների հավաքածու: Շատ սիրեցի և սովրեցա: Շնորհակալություն: Մագի Պետրոսյան, 21.08.2015
Հայ մեծ գեղանկարիչ կոմպոզիցիայի հրաշալի վարպետ: S. Hallaj 25.08.2015
Լավ է իր ժամանակի մեջ և այսօր: Ռ.Արզումանյան, 04.09.2015
Սիրով այցելեցի մեծ վարպետի ցուցասրահը: Նորից ականատես եղա նրա թրթռուն գույների խորհրդավոր խաղին, աշխույժ ու կենսախինդ թեմատիզմին, ոգևորիչ կերպարներին ու ստեղծագործություններում առկա հայերաշունչ բովանդակությունը: Ինձ համար նորություն էր «Դավիթ Բեկ» նկարը, որը նկարիչն արել է 31 տարեկան հասակում: Կցանկանայի, որ ամենաբարձր համարվող պատմական թեմաներով արված գործերը առավել լուսաբանվեին ու ներկայացվեին: Դավիթ Ստեփանյան, ճարտարապետ, 22.09.2015
Շատ հրաշալի գործեր են և ես շատ տպավորված եմ այս նկարիչի աշխատանքներով: Շատ հոգեկան լրացում ստացա: Հաջողություն: Սիրով, Փոլեթ Բարխոդարյան-Արզումանյան, 26.09.2015
Հիանալի դանքարան և հոյակապ գործեր: Առաջնակարգ առաջնորդուհի: Պարույր Արա Նալպանտեան, Գանպերա, 26.09.2015
Շնորհակալ ենք շատ հրաշք ցուցասրահի բացման կապակցությամբ: Տա Աստված, իմ աշխատանքները ևս ցուցադրվեն այստեղ: Սիրանուշ, 03.11.2015
Շնորհակալություն եմ հայտնում նման անբացատրելի պահեր ու հույզեր ապրելուս համար: Ճիշտ է, պր. Իսաբեկյանի նկարները ու նրանցում պարունակվող էներգիան ստանալու համար էի այստեղ, բայց ամբողջ երեկոյի ընթացքում աչքս չէի կտրում Ավ.Չթչյանի «Գեղարդ» կտավից: Որքան վառ գույներ, հստակ երիզներ, իսկ կարպետը նկարից «թափվում» է ձեռքերիդ մեջ: Անչափ ու խորին շնորհակալությունս պր. Չթչյանին մեզ թողած անգնահատելի գանձի համար: Լիլիթ Գևորգյան, 03.11.2015
Մեծ Վարպետի լայնախոհ և տաղանդավոր արվեստի շրջապատում` բարձր գիտակցությամբ, խոնարհվում եմ Էդուարդ Իսաբեկյանի ժառանգության առջև: Հպարտ եմ, որ մեր մայրաքաղաքի սրտում այլևս գոյություն ունի տաղանդավոր այս ստեղծագործությունների օջախը: Շնորհակալություն բոլոր նրանց, ով այս գործում ունեցավ իր ներդրումը: Այստեղ վերադառնալու ակնկալիքով` Հասմիկ Պողոսյան, Հայաստանի մշակույթի նախարար, 12.11.2015
Կարևոր նախաձեռնություն է Էդուարդ Իսաբեկյանի թանգարանի հիմնումը ոչ միայն մեծ վարպետի ստեղծագործության, այլև նրա միջով խորհրդահայ կերպարվեստի շրջանակներում ազգային վերելքը տեսնելու համար: Շնորհակալություն: Լիլիթ Սարգսյան, արվեստաբան, 27.11.2015
Շատ տպավորված եմ, հրաշալի նկարներ և հրաշալի աշխատանք: Շուշանիկ Հաբեշյան, ուսանողուհի, 02.12.2015
Միայն վարպետներից ամենամեծերը կարող են տեսնել և արտահայտել լույսը` թաքնված մթության մեր: Իրինա Գ., ուսանող, 23.12.2015
Ինձ համար Էդուարդ Իսաբեկյանի ցուցասրահն իսկապես մի լավագույն ակադեմիա է, որտեղից կարելի է հավերժ ուսանել: Ես հպարտ եմ, որ մենք ունենք Էդուարդ Իսաբեկյանի պես նկարիչ, որն իր մեջ է կրում ողջ հայ ազգի էությունը: Շնորհակալ եմ նրան այսպիսի մեծ, ուսուցողական և անկրկնելի ժառանգություն մեզ թողնելու համար… Հարությունյան Միքայել, 23.12.2015
Նկարիչ բոլոր գալիք դարերի: Էդման Այվազյան, 2015
Ի դեմս Էդուարդ Իսաբեկյանի մենք ճանաչեցինք հայ մեծ արվեստի մեծ ներկայացուցչի: Շնորհակալ ենք ջերմ ընդունելության համար: Օֆելյա, Վերգուշ, Ռոզա, 2015
Անակնկալ էր ինձ համար, կարծես բոլորովին նոր նկարիչ բացահայտեցի, թեև ինձ թվում էր` գիտեմ նրան: Ս.Միրզոյան, 2015
Զարդարվեստի պետական ուսումնարան: Շնորհակալություն հետաքրքիր ցուցահանդեսի համար: 2015