Ցնցված եմ հատկապես ինքնանկար-գրաֆիկայից և ընդհանրապես ամբողջությամբ ցուցադրված աշխատանքներից: Շնորհակալություն ենք հայտնում, որ դեռ չի կորել նման (թեկուզ նման) պայմաններում ցուցադրման համար: Հուսով ենք, որ մեր հանրապետության այրերը կմտահոգվեն այս ցուցասրահը բարեկարգելու գործում:
Խորին հարգանքով այս գործը կազմակերպողներին:
Երևան քաղաքում ծնված և ապրած ընկերուհիներ` Գայանե Մարտիրոսյան և Զարուհի Պարսամյան, 22.02.2017
Բավականություն, գեղագիտական հաճույք ստացա, միևնույն ժամանակ հոգիս տանջվեց ցավից, սիրտս լացեց… Ամոթ մեր քաղաքապետին, նաև մեզ, մի՞թե կարելի է նման բարձիթողի, անօգնական ու անխնամ թողնել ցուցասրահը: Ամպագոռգոռ բառերի փոխարեն մի փոքր բարեգործություն է պետք… Ռուզաննա Միհրանի Միրաքյան, 17.03.2017
24.03.2017
Շնորհակալություն: Beautiful artworks that need to be seen and appreciated more. Best of luck! 30.03.2017
Բարև Ձեզ, պարոն Էդուարդ Իսաբեկյան: Մեր կյանքի երկրորդ տասնամյակում մենք եկանք ձեր հետ ծանոթանալու: Դուք այստեղ էիք, Դուք ամեն նկարում էիք, Դուք ամեն վրձնահարվածում էիք: Մենք մասնակից եղանք անհավատարիմներին «Տաճարից դուրս» վռնդելուն, մեծ ցավով թաղեցինք իգդիրցուն, ծանոթացանք տիկին Արփենիկի հետ, ձեր մոր հետ, թութուն հավաքեցինք ու հիմա մեկնում ենք կյանք` մեր կտավները Ձեր գույներով ներկելու…
ԵՊՀ Ռուս բան.ֆակ., Միջմշակութ. հարաբերություններ, Վարսենիկ, Մարինե, Անի 10.05.2017
Հայ գեղանկարիչներից Էդուարդ Իսաբեկյանը առանձնանում է իր ուրույն ոճով և առանձին նկարելու ձիրքով: Ես միշտ հիացած եմ նրա կտավներով: Իրավ, իսկական հայ և հայրենասեր:Գ.Գ., 2017
Շնորհակալություն, որ մեզ տրամադրեցիք անվճար ձայնային գիդ, և մենք ծանոթացանք Էդուարդ Իսաբեկյանի կտավների պատմության հետ: 18.05.2017
Այստեղ գտնվող բոլոր կտավներին միավորում է մեկ ընդհանուր բան` արվեստը: Արվեստն է, որ արտահայտում է զգացումները` սերը, ատելությունը, ցավը, ուրախությունը… Շնորհակալություն այստեղ գտնվող բոլոր հիանալի աշխատանքների համար: Ջորջ և Սոֆի, 18.05.2017
Շնորհակալություն Միքայելյանների ընտանիքի կողմից: 20.05.2017
Հաջողություն և բարի լույս ձեր գործերին: Ա., 20.05.2017
Շատ գեղեցիկ պահեր ապրեցի: Իսաբեկյանը պատմական ժանրի նկարիչ է և վերադարձրեց անցյալ, շատ յուրօրինակ զգացողություններ արթնացրեց: Նրա արվեստը անմահ է և մնայուն: Ժաննա Մաճկալյան, 20.05.2017
Մենք` Իզաբելլա, Լուսինե, Կարինե, Գևորգ: Այսօր` ժամը 21:51: Բավականություն ստացանք: 20.05.2017
Այսօր` մայիսի 20-ին, եղա Է.Իսաբեկյանի ցուցասրահում և մի պահ ընկա հիշողությունների գիրկը: Այս մեծ մարդը կարծես ոչնչից չէր վախենում: Շորժայում էինք, նկարիչների հանգստյան տանը: Նա բավականին ծեր էր և աչքերը լավ չէին տեսնում: Հանգստացողները զարմանում էին` տեսնելով նրան լուսաբացին, խարխափելով ստուգում էր ափի լպրտյուն քարերը, զգուշությամբ առաջ էր գնում ու անմիջապես մտնում էր Սևանի սառը ջուրը… Եվ լսվում էր նրա օխա՜յ, օխա՜յ արտահայտությունը, ափը լցվում էր նրանով, որից հետո անցնում էր աշխատանքի: Բնության սիրահար էր, ընկեր էր, խորհրդատու, բանիմաց, մեծ մարդ, մեծ նկարիչ… Անչափ բարձր էր այսօրվա տպավորությունը: Նրա աշակերտների աշխատանքները նույնպես հիասքանչ էին, նրա կենդանությունը, նրա շունչը զգացվում է ցուցահանդեսի ամեն մի անկյունում:Կուզեի հաջորդ անգամ այցելելուց տեսնել շենքի ներսի պատերը և մնացած մեծ ու փոքր թերությունները հիմնովին նորոգված լիներ: Այստեղ մեծ պարտք ունի կատարելու ՀՀ նախագահը իր ողջ անձնակազմով, մի՞թե նրանք չեն տեսնում:
Քաղաք Երևան, ՀՀ քաղաքացի և քույրը նկարիչ Սամվել Համբարձումյանի` Հայկանուշ Համբարձումյան 20.05.2017
Շնորհակալություն: Մեր այցելությունը այս թանգարան մեզ մոտիկից ծանոթացրեց Էդուարդ Իսաբեկյանին և նրա կտավներին: Փարիզից եկած Նանե և Հայկ 25.05.2017
Իսաբեկյանի արվեստը հնչեղ է, դյութիչ, գոռ… Այսօր ինձ հետ կտանեմ նրա մի մասնիկը: Գևորգ 26.06.2017
Հուզված, ցնցված հեռանում եմ, ուղղակի լացել եմ ուզում:
Վալյա Խաչատրյան 10.07.2017
Նկարներում պատկերած յուրաքանչյուրի դեմքում արտահայտված է հայրենիքի հանդեպ մեծ սեր: Հայրենասեր մարդը ուրիշ ձև է ընկալում Իսաբեկյանի նկարները: Զգացածս իրականում անփոխարինելի է: Ժենյա Սարգսյան 11.07.2017
Ձեզանից հետո հայկական կերպարվեստը կոմպոզիցիայի առումով անկում է ապրում և ոչ միայն կոմպոզիցիայի: Կարոտում ենք, Վարպետ: 14.07.2017
Շատ տպավորված եմ: Մեր ազգի պատկառելի հանճարներից է Է.Իսաբեկյանը, և մենք շատ պարտավորված ենք հարգելու և պահպանելու նրա կողմից թողած հոգևոր մշակութային, ինչու չէ, նյութական ժառանգությունը:
Խոնարհումով Է.Իսաբեկյանի վրձնի առաջ` Ս.Ավետիսյան, ք.Մոսկվա, «Տապան» թանգարանի I տնօրեն, 26.08.2017
Շատ շնորհակալ եմ Աստծուց, որ էսպիսի նկարիչ կա Հայաստանում: Բրավո, մաեստրո: Բաղումյան Վահե 28.09.2017
Անկրկնելի նկարիչ բոլոր ժամանակների: Միշտ հպարտ եմ, որ եղել եմ Ձեր ուսանողը: Դ.Վարուժան 07.10.2017
Առաջին անգամ էր, որ այցելեցի Էդ.Իսաբեկյանի այս ցուցահանդեսը: Մինչ այս նկարչի միայն անունը գիտեի և 1-2 նկար: Հաճելի տպավորություններով եմ լցված: Աշխատակցուհին նույնպես շատ դրական մարդ էր: 28.10.2017
Հիացած եմ իմ սիրելի Վարպետի ստեղծագործություններով, որոնք այս պահին զարդարում են Էդուարդ Իսաբեկյան անունը կրող ցուցասրահը: Հուսամ, որ այն մեծ ոգևորություն և ներշնչանք կտարածի ինչպես երիտասարդ արվեստագետների, այնպես էլ բոլոր այցելուների մոտ:
Իմ ջերմ մաղթանքները այս սրահի և ստեղծագործությունների պահպանման գործում ներդրում ունեցող սրտացավ մարդկանց:Հարգանքներով` Էդուարդ Իսաբեկյանի ուսանող, նրա արվեստի երկրպագու Սամվել Համբարձումյան 30.10.2017
Գանատայի բարեկամներուս միջոցաւ ծանօթացայ Ցուցասրահին, շատ մեծ հոգեկան բաւարարութիւն ստացայ արուեստի գործերու ընդմեջեն արուեստագետին ներաշխարհը սուզուելով։ Այցելութիւնը աւելի հետաքրքրական և շինիչ էր շնորհիվ երիտասարդ, տինամիք, և սիրայօժար դանգարանագիտուհիին, ափսոս այս պահին անունը միտքս չէ, որ հասցնում էր թէ այցելուներուն գոհ պահել իր տեղեկացուած գիտելիքներով ամեն մեկ նկարի վերաբերեալ և թէ ընթացիք հարցերը լուծել։
Ափսոս որ ցուցասրահին ֆիզիգական վիճակը ցաւալի է ինչոր չի նպաստեր պաստարներու պահպանման։ Հաճելի էր նայև ծանօթանալ տ.Իսաբեկեանի հետ։ Sosy Kevonian, 06.11.2017
Առաջին անգամ էի այցելում այս ցուցասրահը և բավականին տպավորված եմ: Տպավորություններս այնպիսին են, որ արդեն կիսվելու եմ, պատմելու եմ ցուցասրահի մասին շրջապատում և սոց.ցանցերում: Ուրախ եմ, որ Երևանում՝ մեզ մոտ, կան նման ցուցասրահներ, որոնք շատ կարևոր են սերնդի զարգացման և դաստիարակման համար: Ու ամեն նկար ունի իր «հմայքը», կենդանությունը և գեղեցկությունը, շունչը, գույնը, որը նկարիչը փոխանցել է ստեղծելիս: Կտավներ կան, որ առանձնանում են, քանի որ ցանկացած մարդ տարբեր ընկալումներ ունի և բոլորի մեջ միշտ էլ առանձնացնում է: Սակայն բոլոր կտավներն էլ կանվանեմ մեծ գործեր: Շնորհակալություն շատ: 08.11.2017
Անչափ շնորհակալ եմ, որ հնարավորություն տվեցիք մեզ էլ ավելի մոտ զգալ Իսաբեկյանի արվեստին: 08.11.2017
ԵՊՀ պատմության ֆակուլտետի արվեստաբանության բաժնի չորրորդ կուրսի ուսանողների անունից ուզում եմ շնորհակալություն հայտնել Է.Իսաբեկյանի ցուցասրահին մեր այսօրվա հրաշալի դասի և մեծ Վարպետի աշխատանքները տեսնելու և դրանցով հիանալու հնարավոորություն տրամադրելու համար: 16.11.2017
Իսաբեկյանի աչքերով տեսա Հայաստանը, ստացա մեծ էներգիա ու շատ հպարտ եմ հայ լինելուս մեջ:
Խ.Խաչատրյան 2017
Մեծ բավականություն և խորը ցավ զգացի Էդուարդ Իսաբեկյանի պատկերասրահում: Ստեղծված է շատ լավ արվեստի օջախ, բայց վատ պահպանող տերերի միջոցով: Քաղաքապետարանի խնամքը բացակայում է:
Քանդակագործ Ռ.Սարգսյան 2017
Իսաբեկյանի ցուցահանդեսը բարձրացրեց տրամադրությունս, հետ բերեց այն ժամանակները, երբ Վարպետը մեր կողքին էր: Իսաբեկյանի նկարչությունը միշտ կլինի մեզ հետ` որպես բարձր արվեստ:
Սիրով համբուրում եմ շիրիմդ, Ռաֆիկ Աղաջանյան 2017
Ստացանք մեծ բավականություն Էդուարդ Իսաբեկյանի արվեստից: 2017
Այսպիսի մեծանուն նկարչի թանգարանին հարկավոր է առավել մեծ ուշադրություն և իհարկե հարգանք: Կարող են վնասվել նաև նրա չքնաղ գործերը այս վատ պայմաններում: Շնորհակալություն հանգամանալից էքսկուրսիայի համար:
ԵՊՀ Արվեստաբանության բաժնի մի խումբ ուսանողներ (40 հոգի) 2017
Մեծ Վարպետ, մեծ հայ` ներքին մեծ էներգիայով: Հոգիդ լուսավոր լինի, ուսուցիչ: Լևոն Թադևոսյան 2017