Պապի ջան, երանի մեր հետ լինեիր:
Թոռնիկ Մհեր Իսաբեկյան 07.11.2014
Էդուարդ Իսաբեկյան, հիանալի նկարիչ, ում նկարներում ասելիք կար, գույներ: Ինձ համար յուրահատուկ գեղեցկություն ուներ «Մասրենին և քարերը» նկարը: Թերևս մեկ անգամ ևս հպարտացա ազգիս գանձերով: Հպարտ եմ, որ հայ եմ: Շաքե 07.11.2014
Էդուարդ Իսաբեկյան: Տեսնելով նրա կիսանդրին, թափանցելով նրա քարացած աչքերի մեջ, տեսնում էի գեղեցիկ մի աշխարհ, որը տարբերվում է ներկայից, իր մեջ պահում է ապագայի գաղտնիքները: Տաքարյուն մի նկարիչ: Երանելի են նրա բնորդուհիները, որոնց հետազոտել են այդ աչքերը` երկինք բարձրացած: Ներկայում թող ծնվեն նման աչքերով նկարիչներ և գնահատեն ներկայիս ապշեցուցիչ գեղեցկությունը:
Սիրով` Նախշուն Այվազյան (Ավոյան) 07.11.2014
Ներկա գտնվելով մեծն վարպետ Էդուարդ Իսաբեկյանի 100-ամյակին նվիրված ցուցահանդեսին` ես մեծ բավականություն ստացա` դիտելով այդ աննման գոհարները:
Մերի Մարկոսյան 07.11.2014
Իսաբեկյանը մեծ արվեստագետ է: Նրա վրձնահարվածներն ուժեղ են, գույները` խոսուն, ասելիքը` ընդգրկուն: Հայոց պատմության լռությունը դառնում է խոսուն, պատմական հերոսները` սիրելի և օրինակելի, իմաստուն ու ուսուցանող:
Իսկ բնաշխարհը, հայրենի հողի վրա ապրող մարդիկ սիրով են փարված հայրենի տանն ու օջախին:
Իսաբեկյան մեծ նկարիչը ապրած իր օրերով դեռ լուրջ խոսք է պատգամելու եկել ժամանակների սերունդներին: Ես թիկունքիս զգում եմ նրա սաստող ձայնը.
-Այս հողը ապրողներով է զորեղ:
Այս հողի պտուղը անուշահամ է:
Այս հողը լքող-հեռացողներին կանգնեցնող է պետք:
Դուք էլ Ձեր ասելիքն ունեք:
Հավատում եմ գործիդ անմահությանը:
Ժողովրդիս հանճարի առջև խնկարկու` Գոհար Պետրոսյան 07.11.2014
Նախ և առաջ շնորհակալություն Էդուարդ Իսաբեկյանի 100-ամյա հոբելյանական ցուցահանդեսի համար: Իսաբեկյանը իմ ամենասիրելի ուսուցիչն էր, ես հպարտանում եմ, որ իր ուսանողն եմ եղել և ես իրեն պարտական եմ կայանալու համար որպես նկարիչ: 34 տարեկան հասակում ընդունվել եմ Երևանի Գեղարվեստաթատերական ինստիտուտ: Տարիքս ինձ արջի ծառայություն մատուցեց, սկսվեցին կասկածանքների տարափը իմ հանդեպ: Հալածանքները ինձ շատ էին նեղում, ինձ զրկեցին դիպլոմ պաշտպանելու իրավունքից, և ինձ պատահեց մի հրաշք, ինձ պաշտպան կանգնեց Էդուարդ Իսաբեկյանը, որին հետևեցին Ռոմանոս Սարգսյանը, Մկրտիչ Սեդրակյանը, Վռամշապուհ Շաքարյանը, Արմեն Վարդանյանը, դերասանական ամբիոնի դասախոսներ Արտաշես Հովսեփյանը, Վարդան Աճեմյանը, ինստիտուտի ռեկտոր Մարտին Ենոքի Զարյանը և այլ հարգարժան մարդիկ: Էդուարդ Իսաբեկյանից ստացել եմ երախշավորագիր` Նկարիչների միության անդամ դառնալու համար: Իսաբեկյանի շնորհիվ ոչ միայն ուսման դպրոց եմ անցել, այլ նաև կյանքի դպրոց: Իսաբեկյանը մեծ նկարիչ է, մեծ հայ, մեծ քաղաքացի: Մեծ շուքով Իսաբեկյանը ընտրվել է Երևանի պատվավոր քաղաքացի: 80-անց տարիքում ստորտսմենի պահվածք ուներ: Սևանի լճում մեջքի վրա լողում էր, ծերացավ 90-անց տարիքում: Հիանալի գրքասեր էր, բազմաթիվ հոդվածների հեղինակ էր: «Իգդիր» վեպի հեղինակն էր, որի համար գրկաբաց ընդունվել է Հայաստանի Գրողների միություն: Ունեցել է պատվավոր կոչումներ, վայելել է պետական պատկերասրահի և Գեղարվեստաթատերական ինստիտուտի կոլեկտիվների պատիվն ու հարգանքը: Մասնակցել է Հայրենական պատերազմին: Հաճախ եղել է Ղարաբաղի թեժ մարտի վայրերում:
Մարտիրոս Պետրոսյան, գեղանկարիչ, 08.11.2014
Շատ տպավորված եմ առավել ևս նկարչի ավելի ուշ շրջանի գործերով (1990-ից հետո), այն, որ ընտանիքի սեփականությունն է: Վ.Ամիրխանյան 08.11.2014
Կարծում էի, որ ես նկարել գիտեմ, մինչև տեսա այսպիսի հիանալի, տաղանդավո գեղանկարիչ Է.Իսաբեկյանի գործերը: Խորին շնորհակալություն իր ընտանիքին և պատկերասրահին այս ցուցահանդեսը մեզ ընծայելու համար:
Արմինե, Երևան 08.11.2014
Շնորհավորում եմ!!! Շնորհակալ եմ ցուցահանդեսի համար: Շատ մեծ բավականություն ստացանք ընկերուհիներիս հետ: Հուզվեցի, հիշողություններս Շորժայից խեղդեցին… Շնորհակալ եմ… Ալիս Ադամյան 09.11.2014
Էդուարդ Իսաբեկյանը Հայ կերպարվեստի լավագույն ներկայացուցիչներից է, ազգային ինքնատիպ ու հայեցի` բառիս բուն իմաստով: Նրան տեսնել, ճանաչելը ինձ համար` որպես հայրենադարձի, հրաշքի պես մի բան էր, որ տեղի ունեցավ իմ կյանքում: Մինչև Հայաստան գալս տեսել և իմացել եմ նրա մասին և երազում էլ չէի պատկերացնի, որ մի օր նրա ուսանողը կարող է լինել և մոտիկից ճանաչել նրան ու նրա արվեստը և նրա հետ շփվելու բարեբախտությունը: Որպես գեղանկարիչ և փայլուն մանկավարժ ու գրող, հրապարակախոս, հասարակական գործիչ, ինչպես նաև իրեն դիմագծերով և ներքին հմայքով ամենաօրինակելի հայ մտավորականի կերպար է Էդուարդ Իսաբեկյանը: Շնորհավորում եմ նրա ծննդյան 100-ամյակին նվիրված ցուցահանդեսի կապակցությամբ:
Է.Իսաբեկյանի ուսանող` Արշալույս Աղայան, 09.11.2004
Երջանկահիշատակ Մեծ Վարպետ, խոնարհվում եմ Քո արվեստի և հիշատակի առջև:
Նկարիչ Ցոլակ Կանթեղ 11.11.2014
Նկարչությունից շատ բան չեմ հասկանում, սակայն դիտելով նկարները հեթանոսական ուժ զգացի`անպաճույճ, վեհ, անսանձ բնության տարերք, նկարչության մեջ` Բեթհովեն: Ցուցահանդեսը ապշեցնող էր:
Սուքիասյան Լ. 13.11.2014
Մեծ վարպետին փառք ու պատիվ: Ռուբեն Ադալյան 2014