«Էդուարդ Իսաբեկյանը և իր ուսանողները III»` արդեն ավանդական դարձած ցուցահանդեսով Իսաբեկյան Ցուցասրահը մասնակցեց «Թանգարանային գիշեր 2016» ծրագրին:
- Աթայան Արմեն ● 1922
- Արևշատյան Արևիկ ● 1957
- Բաբայան Յուրի ● 1941-2010
- Գրիգորյան Արման ● 1960
- Գրիգորյան Ռուբեն ● 1954
- Էլիբեկյան Հենրի ●1936
- Հովսեփյան Հրանտ ●1919-1987
- Մելոյան Կառլեն /Կակո/ ● 1930
- Շարաֆյան Արթուր ● 1972
- Պետրոսյան Սամվել ●1941-2012
- Սիրավյան Հենրիկ ● 1928-2001
- Վարդանյան Լեո Լեո ● 1971
Ցուցահանդեսի բացումը կատարեց Էդուարդ Իսաբեկյանի որդին՝ Երեւանի գեղարվեստի ակադեմիայի ռեկտոր Արամ Իսաբեկյանը. «Տեսնում եմ հիանալի հավաքածու, որ ցանկացած նրբանկատ գնահատողի կբավարարի»:
Արամ Իսաբեկյանի խոսքը շարունակեց Հայաստանի նկարիչների միության նախագահ Կարեն Աղամյանը. «Վերջին տարիներին, երբ ուսանողների դիպլոմային աշխատանքների պաշտպանություն է լինում, նկատում ես, թե նկարիչներից ով որ մեկի ազդեցությունն ունի։ Իսկ այստեղ, ուր բազմազան նկարիչներ են, բազմազան են ազդեցությունները, բայց զարմանալին այն է, որ բոլորը աշակերտել են Իսաբեկյանին։ Այստեղից այն եզրակացությունը, թե ինչպիսի մեծ դասախոս է եղել, որ թողել է, որ ուսանողներն ազատ ստեղծագործեն. չի ստիպել, չի թելադրել, չի պնդել, այլ աշխատելու լայն հնարավորություններ է տվել նրանց, թողել, որ ամեն մեկը իր ինքնուրույնությունը պաշտպանի։ Ես ափսոսում եմ, որ իր անմիջական ուսանողը չեմ եղել, հավատացեք, որ նրանից շատ բան եմ սովորել եւ շնորհակալ եմ դրա համար»:
«Նա շատ բան չէր ասում. երկու, երեք բառ կասեր, ընդամենը, բայց այդ մի քանի բառի մեջ այնքան իմաստ ուներ, որ չէր ասի ուրիշ դասախոսը երկու ժամվա ընթացքում»,–նկատեց գեղանկարիչ Կարեն Գասպարյանը։
Իսաբեկյանի մասին ջերմությամբ արտահայտվեց Թորոս Թորանյանը, որը ժամանակին գրախոսել է Էդ.Իսաբեկյանի «Իգդիր» գիրքը:
Հանրապետության ժողովրդական նկարիչ Մասիս Գրիգորյանի գնահատմամբ ափսոսանքն այն է, որ այսօր չկա Էդուարդ Իսաբեկյանի կենդանի ներկայությունը։ «Նրա անունը այսօր էլ եւ ընդմիշտ զարդարելու է մեր գեղանկարչությունը»,–ասաց նա։
Ներկաներին անակնկալ արեց ցուցասրահի ղեկավար Իրինա Իսաբեկյանը` շնորհավորելով ցուցահանդեսի ամենատարեց մասնակից Արմեն Աթայանի 94-ամյակը:
Բացումն ավարտվեց շնորհավորանքներով և ծափողջույններով:
Լրատվամիջոցներն էլ ոգևորված և եռանդով սկսեցին իրենց աշխատանքը:
Էդուարդ Իսաբեկյանը և իր ուսանողները III…21.05.2016
Posted on Մյս 21, 2016 in Միջոցառումներ
