Երևանի Փանոս Թերլեմեզյանի անվան գեղարվեստի ուսումնարանի շենքի ներկայիս վիճակը հանգիստ կարելի է որակել որպես ողբերգական: Ուր որ է փլվելու ենթակա այս շինությունն այսօր իրավասու մարմինների կողմից անուշադրության է մատնված: Սակայն, այս ուսումնարանի մի շարք հայտնի շրջանավարտներ մտադիր չեն լռել և ցանկանում են հանրության ուշադրությունը հրավիրել այս խնդրի վրա: Ձեզ ենք ներկայացնում հայտնի նկարիչ Էդուարդ Իսաբեկյանի խոսքն այս կապակցությամբ:
Հարգարժան պետական այրեր և գործիչներ: Մենք՝ այսօրվա բողոքավորներս, իմացեք, որ վերջինն ենք լինելու, որոնք երեք տասնամյակ անընդմեջ բարձրացրել են Երևանի գեղարվեստի ուսումնարանի վիճակի խնդիրը. հաստատություն, որը ստեղծվել էր դարասկզբին մեր դասական կերպարվեստի գործիչների ջանքերով՝ սկսած Աղաջանյանից, Գյուրջյանից մինչև Առաքելյան ու Սարյան: Այն ավելի քան կես դար կրթել և դաստիարակել է արվեստագետների մի հզոր խումբ, որով կարող է պարծենալ եվրոպական ուզածդ երկիրը, և այսօր էլ շարունակում է իրականացնել իրեն վերապահված առաքելությունը: Բայց որ մենք հաստատ վերջինն ենք լինելու՝ այդ ուսումնարանի շենքի առավել քան անմխիթար վիճակի մասին ձայն բարձրացնողներս, համոզված եղեք լիովին: Քանի որ այդ հոգնած, քայքայված շենքը կարող է մի այնպիսի անակնկալ մատուցել, որը կարող է ճակատագրական լինել և անուղղելի:
Պարոնայք պետական այրեր, մի՛ եղեք լուռ և անտարբեր, որովհետև այն սպասելիքի պատասխանատուն, որ կարող է ամեն օր հրամցնել այդ քայքայված շենքը, լինելու եք դուք՝ հարգարժան պետական այրեր: Խնդրում ենք և պահանջում, որ լսեք մեր ձայնը քանի դեռ ուշ չէ և դեռ չի եղել ամենազարհուրելին՝ մարդկային կորուստը:
Էդուարդ Իսաբեկյան