Էդուարդ Իսաբեկյանը ծնվել է 1914թ. նոյեմբերի 8-ին, Սուրմալու գավառի կենտրոն Իգդիր քաղաքում: Այդ տարիներին Իգդիրը տարածաշրջանի տնտեսական աշխույժ կյանքով ապրող քաղաք էր, որն ուներ նաև կարևոր ռազմավարական նշանակություն` Արևմտահայաստանին կապող հանգուցակետ լինելով:
Թուրքական կոտորածների սպառնալիքի ներքո Իսաբեկյանների գերդաստանը, թողած հայրենիք ու պապակ օջախ, տեղափոխվում են Երևան: Այստեղ շնորհալի պատանի Էդուարդը հաջողությամբ վերջացնում է միջնակարգ դպրոցը և ընդունվում Թբիլիսիի Գեղարվեստի ակադեմիա: 1941թ. վերջացնելով ակադեմիան, Էդուարդ Իսաբեկյանը լուրջ հայտ է ներկայացնում որպես տաղանդավոր և փայլուն գեղանկարիչ: Շուտով ընտանիքը տեղափոխվում է Երևան, և նա սկսում է դասավանդել Երևանի գեղարվեստի ինստիտուտում: 1963թ. Իսաբեկյանին շնորհվում է պրոֆեսորի կոչում: 1967թ. պրոֆեսոր Էդուարդ Իսաբեկյանը նշանակվում է Հայաստանի պետական պատկերասրահի դիրեկտոր: Նրա կազմակերպչական ունակությունների շնորհիվ պատկերասրահը հարստանում է մի շարք թանկարժեք գործերով, կտավներով, բարձր հիմքերի վրա են դրվում տարվող աշխատանքները:
Իսաբեկյանը բազմաժանր նկարիչ է, նրա կտավներից շատերն աչքի են ընկնում հայրենասիրությամբ, արտահայտչականությամբ: Միաժամանակ, Իսաբեկյանը գրքի հիանալի նկարազարդող է: «Վարդանանք», «Մխիթար Սպարապետ» և այլ գրքերի նրա նկարազարդումները հայրենասիրական մեծ շնչով են արված, պարզ են ու մատչելի: Պրոֆեսոր Էդուարդ Իսաբեկյանը հարյուրավոր երիտասարդ արվեստագետներ է դաստիարակել, նրանց տաղանդը դնելով ճշմարիտ արվեստի ուղու վրա:
Բեղմնավոր աշխատանքի համար 1963 թ. Իսաբեկյանին շնորհվում է Հայաստանի Հանրապետության ժողովրդական նկարչի պատվավոր կոչում, ընտրվում է ԽՍՀՄ Գերագույն խորհրդի պատգամավոր, պարգևատրվում Կարմիր դրոշի շքանշանով, մի շարք պատվոգրերով:
Էդուարդ Իսաբեկյանի հայրը` Հմայակ Իսաբեկյանը, Իգդիրից էր, մայրը` Սաթենիկ Ղազարյանը, Կողբից: Հմայակն զբաղվել է առևտրով և Իգդիրում ուներ առևտրական խանութ: Նա առևտրի բնագավառում աշխատեց նաև խոհրդային կարգերի օրոք: 1918թ. գարնանը Իսաբեկյանները Սուրմալուից գաղթում են, ապա նույն թվի ամռանը նորից վերադառնում, հավաքում հացահատիկի բերքը և կրկին թողնում հայրենի օջախը: Հմայակը և Սաթենիկն ունեցել են Կարինեին, Հրայրին, Ռուզաննային, Էդվարդին: Կարինեն վերջացրել է Երևանի պետական համալսարանը և երկար տարիներ աշխատել «Արարատ» տրեստում: Կարինեն ունի Ռաֆայել և Սյուզան զավակներին: Ռաֆայելը քանդակագործ է, երկար տարիներ բնակվում ու աշխատում է Մոսկվայում, ունի երկու զավակ:
Հրայր Իսաբեկյանը ճանաչված արվեստագետ է:
Ռուզաննան սովորել է Մոսկվայի համալսարանում, ճարտարապետ է: Ամուսնացել է ակադեմիկոս, ՀԽՍՀ Գերագույն խորհրդի նախագահության նախագահ Նագուշ Հարությունյանի հետ և ունեն Արային:
Էդուարդ Իսաբեկյանն ամուսնացել է փառաբանված նկարիչ Դմիտրի Նալբանդյանի քրոջ` Արփենիկ Նալբանդյանի հետ:
Իսաբեկյանի նկարները ցուցադրվել են Երևանում, Մոսկվայում, ԱՄՆ-ում, Թիֆլիսում, Հալեպում: ԽՍՀՄ մի շարք պատկերասրահներում, նաև մասնավոր անձանց մոտ բազմաթիվ են Էդուարդ Իսաբեկյանի վրձնի հմայիչ աշխատանքները:
Էդուարդ Իսաբեկյանն ու Արփենիկ Նալբանդյանն ունեն Մհերին և Արամին: Մհեր Իսաբեկյանը վերջացրել է Երևանի Գեղարվեստի ինստիտուտը, նկարիչ է, ունի բազմաթիվ հանրաճանաչ կտավներ և ներկայումս բնակվում ու աշխատում է ԱՄՆ-ի Լոս Անջելես հայաշատ քաղաքում: Մհերն ունի Արփենիկին, Էդվարդին:
Արամը վերջացրել է Երևանի Գեղարվեստի ինստիտուտը:
Ավագյան Ս. – Իսաբեկյան Էդուարդ Հմայակի — Ե., 2000
Posted on Հկտ 1, 2015 in Uncategorized