Երեկ սգո հանդերձանքի մեջ էին «Արամ Խաչատրյան» համերգային մեծ դահլիճի մուտքն ու ճեմասրահը: Երևանցիները և մայրաքաղաքի հյուրերը այստեղ վերջին հրաժեշտը տվեցին կյանքի 93-րդ տարում վախճանված Հայաստանի ժողովրդական նկարիչ, Հայաստանի պետական մրցանակի դափնեկիր, պրոֆեսոր, Երևանի պատվավոր քաղաքացի, «Իգդիր» հայրենակցական միության պատվավոր նախագահ Էդուարդ Իսաբեկյանին:
Դահլիճի մուտքի առջև պսակներ էին դրված ՀՀ նախագահ Ռ.Քոչարյանի, ՀՀ վարչապետի, Ամենայն հայոց կաթողիկոսի, նախարարությունների, կուսակցությունների, այլ գերատեսչությունների ու կազմակերպությունների և անհատների, թաղման կառավարական հանձնաժողովի կողմից:
Հրաժեշտ տալու էին եկել գրողներ, արվեստագետներ, գիտնականներ, ուսանողներ, սփյուռքահայ հյուրեր: Այստեղ թաղման կառավարական հանձնաժողովը՝ ՀՀ փոխվարչապետ Հովիկ Աբրահամյանի գլխավորությամբ, ՀՀ Սահմանադրական դատարանի նախագահ Գագիկ Հարությունյանը, Երևանի քաղաքապետ Երվանդ Զախարյանը, այլ պաշտոնատար անձինք:
«Երևանի գեղարվեստա-թատերական ինստիտուտում ես Իսաբեկյանի սանն եմ եղել, և նա ինձ հետ, չգիտեմ ինչու, լավ հույսեր էր կապել, իմ հանդեպ հատուկ համակրանք ուներ: Հետաքրքրական է, որ այնուհետև իմ մանկավարժը եղել է նրա կինը՝ նույնպես նշանավոր արվեստագետ Արփենիկ Նալբանդյանը: Ես հիշում եմ գեղանկարիչ Իսաբեկյանի առաջին էտյուդներից մեկը՝ «Փշատենիները», մինչև այսօր էլ այդ պատկերն իմ աչքի առաջ է: Նա մեր նախորդ մեծ վարպետների՝ Վ.Սուրենյանց և ուրիշներ, իսկական ազգային շարունակությունն է»,- ասաց Սանկտ Պետերբուրգից ժամանած, հանրապետության վաստակավոր նկարիչ Զախար Խաչատրյանը:
ՀՀ ժողովրդական նկարիչ, պրոֆեսոր Մասիս Գրիգորյանի խոսքերով.«Լուսահոգի Էդ.Իսաբեկյանի տեղը երկար ժամանակ բաց կմնա, բայց մխիթարվում ենք այն բանով, որ նա հսկայական ժառանգություն թողեց, որի արժեքն այժմ մինչև վերջ էլ չենք իմանում: Նրա արժեքն աստիճանաբար մեծանում է, թանկանում: Նրա այդ թողած բացը կաշխատեն մասամբ լրացնել նրա բազում աշակերտները, որոնք այսօր ճանաչված արվեստագետներ են»:
Էդ.Իսաբեկյանը եղել է ՀՀ փոխարտգործնախարար Գեղամ Ղարիբջանյանի հոր՝ Տիգրան Ղարիբջանյանի բարեկամը, և Գ.Ղարիբջանյանն ասաց, որ երկուսն էլ գնում էին Սև ջուր, ձկնորսության, երկար ժամանակ նստում գետափին և իրենց հայացքներն ուղղում դեպի սահմանից այն կողմ, դեպի հեռավոր կարոտ-ծննդավայր Իգդիր:
Էդ.Իսաբեկյանի մահվան առիթով իր ցավակցությունը հայտնելու էր եկել ՀՀ նախագահ Ռոբերտ Քոչարյանը:
Հոգեհանգստյան արարողությունից հետո սգո թափորը ուղղություն վերցրեց դեպի Երևանի Կոմիտասի անվան զբոսայգու պանթեոն, որտեղ տեղի ունեցավ թաղման արարողությունը:
Կատարվեց հոգեհանգստյան պաշտոն: ՀՀ նկարիչների միության նախագահ Կարեն Աղամյանը հրապարակեց թաղման կառավարական հանձնաժողովի պատրաստած խոսքը, որտեղ մասնավորապես ասված էր.«…Իր հրաշալի կտավներով Էդ.Իսաբեկյանը մշտապես գրավել է արվեստագետների և գեղարվեստական քննադատների ուշադրությունը: Նրան են նվիրված բազմաթիվ ուսումնասիրություններ՝ հոդվածներ, ալբոմներ, մենագրություններ: Նկարչի մասին դեռ շատ կգրվի, քանզի նա իսկապես խոր ակոս է թողել հայ կերպարվեստում»:
Սգո մեղեդիների ներքո հանգուցյալի դագաղը իջեցվեց գերեզման՝ Սիլվա Կապուտիկյանի և Գոհար Գասպարյանի գերեզմանների հարևանությամբ: