ԹԲԻԼԻՍԻ (ՀՀԳ-ի հատուկ թղթ. Գ.Բացիաշվիլի): «Երբ այցելում ես անծանոթ ցուցահանդեսը, մշտապես համակվում ես նոր բան գտնելու հաճելի զգացումով: Եվ որքա՜ն վարձատրված ես լինում, երբ սպասելիքներդ զուր չեն անցնում, պայծառանում ես նրա նկարներից հորդացող ինքնատիպ ու կենսահաստատ՝ արվեստի ճառագայթներով»: Սա Վրաստանի պետական պատկերասրահի տպավորությունների գրքում արված գրառումներից մեկն է միայն, որտեղ երեք շաբաթ շարունակ ցուցադրվում էին Հայաստանի ժողովրդական նկարիչ Էդվարդ Իսաբեկյանի կտավները:
Թբիլիսիում ներկայացված էին 25 տարվա ընթացքում նկարչի վրձնած 300 լավագույն կտավները: Իսաբեկյանի ստեղծագործությունները խորապես ազգային են: Աշխատանքներն աչքի են ընկնում թեմատիկայի բազմազանությամբ և կատարման բարձր տեխնիկայով: Արվեստագետը ստեղծել է բազմաֆիգուր բարդ կոմպոզիցիաներ: Այդ տեսակետից առավել բնորոշ են «11-րդ բանակի մուտքը Երևան», «Դավիթ-Բեկ», «Հաղպատի գյուղացիների ապստամբությունը 1903 թվականին» պատմական թեմայով աշխատանքները: Գրավիչ են Սասունցի Դավթի երկու տարբերակները՝ «Պատանի Դավիթը» և «Հե՜յ ջան սարեր, Սասնա սարեր» կտավները:
Գրաֆիկական աշխատանքներից անհրաժեշտ է նշել Դերենիկ Դեմիրճյանի «Վարդանանք» պատմավեպի համար գերազանց ոճով կատարված նկարազարդումները:
Դիմանկարներում հեղինակը ձգտում է ոչ միայն ցույց տալ բնականին հարազատ մնալը, այլև մարդկանց տրամադրությունը (ինքնանկարներ, վրաց ականավոր վիպասան Կոնստանտինե Գամսախուրդիայի դիմանկարը): Անմոռաց են Անդրկովկասի ժողովուրդների բարեկամության աննման երգիչ Սայաթ-Նովային ողջ հասակով մեկ պատկերող կտավը և Ավետիք Իսահակյանի դիմանկարը:
Մի քանի օր առաջ թբիլիսցիները հավաքվել էին Է.Ի. ցուցահանդեսի փակմանը:
-Ուսումնառության տարիներին Է.Ի. մեծ հույսեր էր ներշնչում,- ասաց ՍՍՌՄ ժողովրդական նկարիչ Ուչա Ջափարիձեն: — Դիտելով այս ցուցահանդեսը, մենք կարող ենք ասել, որ այդ հույսերը լիովին արդարացվել են:
-Այստեղ ներկա գտնվող վրաց նկարիչներն ուրախանում են իրենց արվեստակից ընկերոջ հաջողություններով,- ասաց Վրաստանի ժողովրդական նկարիչ, քանդակագործ Ն.Կանդելակին:
Հայ նկարչի առնական արվեստի, նրա կերտած գործերի ազգային կոլորիտի մասին ջերմորեն արտահայտվեցին Վրաստանի ժողովրդական նկարիչներ, Թբիլիսիի գեղարվեստի ակադեմիայի ռեկտոր Ա. Քութաթելաձեն, Կ.Սանաձեն, ռեսպուբլիկայի արվեստի վաստակավոր գործիչ, «Սաբճոթա խելովնեբա» («Սովետական արվեստ») ամսագրի խմբագիր Օ.Էգաձեն և ուրիշներ: