Սովետահայ կերպարվեստում իր ուրույն տեղն է զբաղեցնում հայ ազգային գեղանկարչության նշանավոր վարպետներից մեկը՝ հանրապետության ժողովրդական նկարիչ, պրոֆեսոր ԷԴՈՒԱՐԴ ԻՍԱԲԵԿՅԱՆԸ, որի ստեղծագործությունը հայրենիքին, նրա հողին, նրա մարդուն ու պատմությանը անձնվիրաբար ծառայելու օրինակ է: Ահա արդեն ավելի քան կես դար է, ինչ Իսաբեկյանի կենսահաստատ, ռոմանտիկական ընդգրկումով շեշտված նկարչությունը հիացմունք է պատճառում սերունդներին, դարձել է ազգային արվեստի անբաժանելի մասը, դուրս եկել համամիութենական ասպարեզ:
Գեղանկարչության որ ժանրում էլ աշխատել է վարպետը, աշխատել է սիրով, նվիրվածությամբ, ստեղծել է այնպիսի մնայուն գործեր, որոնք հիացմունք կպատճառեն տասնյակ սերունդների: Նրա ժանրային դիապազոնը լայն ընդգրկում ունի՝ փոքրածավալ էտյուդներից մինչև բարդ սյուժետային կտավները:
Ժամանակների խոսուն վկաներ են դարձել «Պատանի Դավիթը», «Հեյ, ջան սարեր, Սասնա սարեր», «Ավարայրի ճակատամարտը», «Պատասխան Հազկերտին» կտավները, որոնք պատմական գեղանկարչության ուշագրավ գործեր են: Հետևելով հայ մեծ նկարիչ Վարդգես Սուրենյանցին, արվեստագետը ստեղծել է իր՝ «Իսաբեկյանական աշխարհը», որ յուրօրինակ ասք է հայրենիի պատմության, նրա հեռավոր ու մոտ հերոսական էջերի մասին:
Գեղանկարչական այս շարքը առանձնակի հմայքով են հարստացնում Դ. Դեմիրճյանի «Վարդանանք» և Ս. Խանզադյանի «Մխիթար սպարապետ» պատմավեպերի նկարազարդումները, որոնք սովետահայ գրքապատկերազարդման դասական նմուշներ ե
Այս օրերին էլ 74-ամյա վարպետը երիտասարդական ավյունով ու թափով ստեղծում է նոր կտավներ՝ սովետահայ դասական գեղանկարչության նոր էջեր:
Սիրված արվեստագետի վաստակի յուրօրինակ գնահատական է «Է.Իսաբեկյան» ալբոմը, որը «Սովետսկի խուդոժնիկ» հրատարակչությունը լույս է ընծայել «Սովետական արվեստի վարպետներ» մատենաշարով: Տաղանդավոր արվեստագետի ստեղծագործությունը բնութագրող առաջաբանով հանդես է եկել ալբոմը կազմողը՝ արվեստաբան Պողոս Հայթայանը:
Ալբոմում զետեղված են Է.Իսաբեկյանի ստեղծագործության մասին հայ մշակույթի անվանի գործիչների արտահայտած կարծիքներ, ինչպես նաև տրված են նկարչի կյանքի և ստեղծագործության տարեթվերը: Կան նրա ստեղծագործությունների գունավոր և սև-սպիտակ մեծաթիվ վերատպություններ:
Ալբոմի առաջին օրինակները ստացան օրերս Մոսկվայում Է.Ի. անհատական ցուցահանդեսի բացման մասնակիցները, որոնց վրա նկարիչը սիրով իր ընծայագրերը թողեց:
Արմենպրես
«Երեկոյան Երևան», 04.10.1988թ․