Իսաբեկյան Էդուարդ (ծն.1914). – նկարիչ. ՀՍՍՀ ժողովրդական նկարիչ (1963): Ծնվել է Իգդիրում (այժմ` Թուրքիա): Մասնագիտական կրթությունն ստացել է Թբիլիսիի գեղարվեստների ակադեմիայում, ավարտել 1941թ.: Հաջորդ տարի մեկնել է ռազմաճակատ: Վերադարձին կազմակերպել է ռազմաճակատային նկարների իր առաջին անհատական ցուցահանդեսը: Հետագայում ցուցահանդեսներ է ունեցել Երևանում` 1947 և 1965թթ, Թբիլիսիում` 1966թ.: 1967թվականից վարում է Հայաստանի պետական Պատկերասրահի դիրեկտորի պաշտոնը: 1940 թվականից սկսած մասնակցել է հանրապետական, միութենական և արտասահմանյան բազմաթիվ ցուցահանդեսների: 1950թ. նրա «Խ.Աբովյանը Արարատի բարձունքին» արժանացել է հանրապետական մրցանակի: Լավագույն գործերից են` «11-րդ բանակի մուտքը Երևան», «Դավիթ-Բեկ», «Ավարայրի ճակատամարտը», «Պատասխան Հազկերտին», «Պատանի Դավիթը», «Չվերադարձան», Դ.Դեմիրճյանի, Ա.Բակունցի, Մեսրոպ Մաշտոցի, Ա.Իսահակյանի և այլոց դիմանկարները, «Ինքնանկար», «Խնձորեսկ» և այլն: Նկարազարդել է Դ.Դեմիրճյանի «Վարդանանքը», Հ.Թումանյանի «Թմկաբերդի առումը», Ս.Խանզադյանի «Մխիթար Սպարապետը»: Զբաղվում է նաև մանկավարժական աշխատանքով, դասավանդում Երևանի գեղարվեստա-թատերական ինստիտուտում:
Ստեփանյան Գ. -Կենսագրական բառարան (Հայ մշակույթի գործիչներ) – Ե., «Հայաստան» հրատ, հ. Բ, էջ 13, 1981
Posted on Փտր 14, 2017 in Uncategorized