Էդուարդ Իսաբեկյանի ստեղծագործությունների ցուցասրահ – Ե., 2013

Posted on Հնվ 29, 2016 in Uncategorized

Սիրելի երևանցիներ, արվեստասեր բարեկամներ.

       Երևանյան մշակութային հաստատությունների շարքում այսուհետ իր առանձնահատուկ տեղը կունենա ժողովրդական նկարիչ Էդուարդ Իսաբեկյանի մշտական ցուցասրահը:
Շնորհակալ եմ Արամ Իսաբեկյանին ու ընտանիքին այս արժեքավոր նմուշների նվիրատվության համար, որոնց հավաքական ցուցադրումը մեզանում կդառնա իսաբեկյանական մթնոլորտի գեղեցիկ ներկայություն:
Համոզված եմ, որ այն կլինի արվեստասեր հասարակության սիրելի վայրերից մեկը, ուր մարդիկ անմիջականորեն կշփվեն բարձր արվեստի հետ` իրենց հետ տանելով Մեծ նկարչի հույզերն ու գույները: Իսաբեկյանական այս եզակի օջախը նպաստավոր կլինի նաև սերունդներ կրթելու ու բազմաթիվ երիտասարդների գեղագիտական ճաշակի ձևավորման համար:
     Այս ցուցասրահի առկայությունը մեր համեստ տուրքն է Վարպետին` իր անգնահատելի ստեղծագործական ժառանգության դիմաց:

Երևանի քաղաքապետ
Տարոն Մարգարյան

 

 

Էդուարդ Իսաբեկյանի գեղանկարչական աշխատանքների մշտական ցուցասրահի բացում

 

Տարիներ առաջ, 2004 թ-ի նոյեմբերի 8-ին,Էդուարդ Իսաբեկյանի 90-ամյա հոբելյանի առթիվ ՀՀ Նկարիչների միության ցուցասրահում բացվեց նրա հոբելյանական ցուցահանդեսը, որին նաև մասնակցում էին ՀՀ վարչապետ, երջանկահիշատակ Անդրանիկ Մարգարյանը և Երևանի քաղաքապետ Երվանդ Զախարյանը:

Նկարչի անհատական հոբելյանական ցուցահանդեսի բացման հանդիսությունից հետո, բարձր գնահատելով նրա մեծագույն ներդրումը 20-րդ դարի հայ մշակույթի զարգացման մեջ, ինչպես նաև կարևորելով Վարպետի գեղանկարչական մեծ արժեք ներկայացնող աշխատանքների հավաքական պահպանումը, ցուցադրումն ու հանրությանը ներկայացումը, վարչապետ Անդրանիկ Մարգարյանի կողմից հանձնարարական տրվեց քաղաքապետարանին` Երևանում ստեղծել Էդուարդ Իսաբեկյանի անվան թանգարան:

Քաղաքապետի կողմից որոշում կայացվեց «Հայ Արտ» մշակութային կենտրոնի առաջին հարթակում կազմակերպել Էդուարդ Իսաբեկյանի նկարների գործող մշտական ցուցահանդես:

Ցավոք, Էդուարդ Իսաբեկյանի և Անդրանիկ Մարգարյանի կենդանության օրոք այդ որոշումը կյանքի կոչելու հնարավորություն չեղավ:

Անցավ բավական ժամանակ և վերջապես եկավ այն օրը, երբ հնարավորություն ընձեռվեց բացել այդ ցուցասրահը, որի հիմքն են կազմում իմ կողմից Երևան քաղաքին նվիրաբերված Էդուարդ Իսաբեկյանի թվով 28 գեղանկարչական կտավ:

Կարծում եմ` հետաքրքիր սիմվոլիկ բան ստացվեց. այն որոշումը, որի հիմքում 2004 թ-ին դրված էր վարչապետ Անդրանիկ Մարգարյանի կամքը, իրականացվում է 2013 թ-ին` ներկայիս քաղաքապետ Տարոն Մարգարյանի օրոք:

Ցանկանում եմ շնորհակալությունս հայտնել քաղաքապետարանին` տրամադրած տարածքի համար, անձամբ Երվանդ Զախարյանին և Տարոն Մարգարյանին: Նաև շնորհակալական խոսք եմ ուզում հղել Գագիկ Ծառուկյանին և Կարո Շահբազյանին, որոնց նվիրատվությունների շնորհիվ տեղադրվեցին ցուցասրահի ջեռուցման և անվտանգության համակարգերը:

Համոզված եմ, որ այս ցուցասրահը կհամալրի այն հիանալի թանգարանների շարքը, որոնցով այսօր, հիրավի, գեղեցկանում և հարստանում է մեր սիրելի Երևանը:

Երևանի Գեղարվեստի Պետական Ակադեմիայի ռեկտոր, պրոֆեսոր,

Արվեստի վաստակավոր գործիչ

Արամ Իսաբեկյան   

Leave a Reply

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով