Էդուարդ Իսաբեկյանը և իր աշակերտները նույն վայրում – Ե., «panorama.am», 14.05.2015

Posted on Հկտ 17, 2015 in Uncategorized

     Ժողովրդական նկարիչ Էդվարդ Իսաբեկյանը երկար տարիներ դասավանդել է Երևանի գեղարվեստա-թատերական ինստիտուտում (2000 թ-ից՝ Երևանի գեղարվեստի պետական ակադեմիա)՝ ղեկավարելով ստեղծագործական արվեստանոցներից մեկը: Այդ տարիներին նա շատերին է կրթել, նպաստել մասնագիտական հմտությունների զարգացմանը: Այսօր Իսաբեկյանի ու նրա ուսանողներից շատ շատերի ստեղծագործությունները ցուցադրվում են կողք կողքի:
      Մայիսի 16-ին Հայ Արտ մշակութային կենտրոնի «Էդուարդ Իսաբեկյան» ցուցասրահում բացվելու է ցուցահանդես՝ «Էդուարդ Իսաբեկյանը և իր աշակերտները» խորագրով:
      Panorama.am-ի հետ զրույցում ցուցասրահի վարիչ Իրինա Իսաբեկյանն ասաց, որ ներկայացվելու է վարպետի 14 աշակերտի 24 ստեղծագործություն՝ Գրիգոր Խանջյան, Վահան Խորենյան, Արամ Իսաբեկյան, Սարգիս Մուրադյան, Ռուբեն Հովնաթանյան և ուրիշներ:
«Դիմել եմ աշակերտներին՝ ստեղծագործություններ տրամադրելու համար, մեծ սիրով համաձայնվել են»,- ասաց Ի. Իսաբեկյանը:
      Նա նշեց, որ նույն խորագրով ցուցահանդես կլինի նաև նոյեմբերին. «Վստահ եմ, որ մայիսի 16-ին բացվող ցուցահանդեսի ժամանակ լինելու են նկարիչներ, ովքեր ասելու են, որ իրենք էլ են եղել Իսաբեկյանի աշակերտները: Դրա համար ուզում եմ շարունակական լինի»:
Ցուցասրահի տնօրենի խոսքով, ցուցահանդեսների նման շարք կազմակերպելու հիմնական նպատակն է ևս մեկ անգամ ցույց տալ Էդուարդ Իսաբեկյանի մեծությունը, վարպետությունը, մանկավարժի ձիրքը, ով կարողացել է այդպիսի աշակերտներ ունենալ:
       «Իր պատմական նկարներով Իսաբեկյանը Վարդգես Սուրենյանցի կողքին է, բնության մեջ անկաշկանդ, նազանի կանացի իր կերպարներով՝ նա Ալեքսադր Բաժբեուկ- Մելիքյանի կողքին է, հայրենի բնությամբ և հերոսներով նա Դերենիկ Դեմերճյանի, Համո Սահյանի, Վահագն Դավթյանի կողքին է: … Նա միայն ժողովրդական նկարիչ չէր, այլև հայրենասեր քաղաքացի: Նա քսան տարի ղեկավարել է Հայաստանի ազգային պատկերասրահը, ստեղծել նրա մասնաճյուղերը հանրապետության տարբեր քաղաքներում, նրա ժամանակ ընդլայնվել է պատկերասրահի ցուցադրելի մակերեսը, նա էր Ռուբեն Դրամբյանի նման փայփայում հայ միջնադարյան արվեստի ցուցադրումը այնտեղ: Էդվարդ Իսաբեկյանի ծառայությունները գնահատվեցին նաև հետխորհրդային շրջանում: Նա Մեսրոպ Մաշտոցի շքանշանակիր էր և «Իգդիր» հայրենակցական միության պատվավոր նախագահը»,- այսպես է նկարագրել Էդուարդ Իսաբեկյանին արվետագիտության դոկտոր, պրոֆեսոր, ՀՀ մշակույթի վաստակավոր գործիչ Վիգեն Ղազարյանը:

https://www.panorama.am/am/news/2015/05/14/irina-isabekyan/53395

Leave a Reply

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով