Վախճանվել է Էդուարդ Իսաբեկյանը
Ինչպես հայտնեցին ՀՀ կառավարության տեղեկատվության և հասարակայնության հետ կապերի վարչությունից, ՀԽՍՀ ժող.նկարիչ Էդ.Իսաբեկյանի մահվան կապակցությամբ ՀՀ փոխվարչապետ Հովիկ Աբրահամյանի որոշմամբ ստեղծվել է կառավարական հանձնաժողով՝ ՀՀ փոխվարչապետի նախագահությամբ:
Հանձնաժողովը տեղեկացնում է, որ Էդ.Իսաբեկյանի քաղաքացիական հոգեհանգիստը տեղի կունենա այսօր՝ օգօստոսի 21-ին, ժամը 18.00-ից, Սայաթ-Նովա 5 հասցեում:
Օգոստոսի 22-ին, Ալ. Սպենդիարյանի անվան Օպերայի և բալետի ազգային ակադեմիական թատրոնի Արամ Խաչատրյան մեծ դահլիճում (մուտքը Մ.Մաշտոցի պողոտայից) ժամը 12.30-14.00-ն տեղի կունենա վերջին հրաժեշտը նկարչին, այնուհետև՝ հուղարկավորության արարողությունը՝ Երևանի Կոմիտասի անվան պանթեոնում:
***
Ժողովրդական նկարիչ Էդուարդ Իսաբեկյանի մահվան կապակցությամբ նախագահ Ռոբերտ Քոչարյանը ցավակցական ուղերձ է հղել Իսաբեկյանների ընտանիքին:
Ուղերձում ասված է.
«Խոր ցավով տեղեկացա Հայաստանի Հանրապետության Ժողովրդական նկարիչ Էդուարդ Իսաբեկյանի մահվան մասին:
Նրա կտավները, որ կրում են հայ կերպարվեստի լավագույն ավանդույթների կնիքը, արժանացել են ժողովրդի բարձր գնահատանքին:
Իմ ցավակցությունն եմ հայտնում Իսաբեկյանների ընտանիքին ու հարազատներին»:
ՀՀ նախագահի մամլո գրասենյակ
***
ՀՀ վարչապետ Սերժ Սարգսյանը ցավակցական հեռագիր է հղել արդի հայ գեղանկարչության անվանի դեմքերից մեկի՝ Հայաստանի ժողովրդական նկարիչ Էդուարդ Իսաբեկյանի մահվան կապակցությամբ, որում ՀՀ կառավարության և իր անունից խորին վշտակցություն է հայտնել նրա հարազատներին, մերձավորներին և նրա արվեստի բոլոր երկրպագուներին:
Էդուարդ Իսաբեկյան
Հայ կերպարվեստը ծանր կորուստ կրեց.93 տարեկան հասակում կյանքից հեռացավ ՀԽՍՀ ժող.նկարիչ, ՀՀ պետական մրցանակի դափնեկիր, պրոֆեսոր, Երևանի պատվավոր քաղաքացի Էդ.Իսաբեկյանը:
Էդուարդ Իսաբեկյանը ծնվել է 1914թ Երևանի նահանգի Սուրմալու գավառի Իգդիր քաղաքում: 1918թ ընտանիքի հետ Երևան տեղափոխվելուց հետո սովորել և ավարտել է Երևանի գեղարվեստա-արդյունաբերական տեխնիկումը (ներկայիս Փ.Թերլեմեզյանի անվան գեղարվեստի ուսումնարան), ապա՝ 1935թ-ից ուսումը շարունակել Թբիլիսիի գեղարվեստի ակադեմիայում: Հայրենական մեծ պատերազմի տարիներին Նաիրի Զարյանի և Սողոմոն Տարոնցու հետ եղել է ռազմաճակատում՝ հայկական 89-րդ դիվիզիայի վերաբերյալ նյութեր հավաքելու և գեղանկարչական գործեր ստեղծելու նպատակով:
Էդուարդ Իսաբեկյանը Երևանի գեղարվեստի պետական ինստիտուտի հիմնադիրներից էր, որտեղ աշխատել է 1945թ-ից մինչև կյանքի վերջը՝ ղեկավարելով գեղանկարչական արվեստանոցներից մեկը: Մանկավարժական ավելի քան վաթսուն տարիների ընթացքում նա ստեղծել է իր դպրոցը և ուսուցման գիտական մեթոդիկան, կրթել ու դաստիարակել շնորհալի արվեստագետների առնվազն երեք սերունդ:
Դասախոսական աշխատանքին զուգընթաց, Էդ.Իսաբեկյանը կատարել է բազմաթիվ հասարակական աշխատանքներ՝ բազմիցս ընտրվել Երևանի քաղաքային խորհրդի պատգամավոր, Հայաստանի նկարիչների միության քարտուղար: 1967-ից մինչև 1987թ եղել է Հայաստանի պետական (ներկայումս՝ Ազգային) պատկերասրահի տնօրենը, որտեղ հսկայական ջանքեր է գործադրել ֆոնդերի հարստացման և հատկապես անցյալի ազգային արժեքները կորստից փրկելու ուղղությամբ: Նրա նախաձեռնությամբ է բացվել պատկերասրահի Գյումրու մասնաճյուղը:
Իսաբեկյան արվեստագետի շռայլ տաղանդը ամենատարբեր դրսևորումներ է ստացել ինչպես գեղանկարչական մեծածավալ կոմպոզիցիոն կտավներում, այնպես էլ արվեստի հիմնահարցերին նվիրված ուշագրավ հոդվածներում, հրապարակային ելույթներում և հուշապատումներում:
Էդ.Իսաբեկյանի արվեստի հիմքը մարդասիրությունն ու խոր հայրենասիրությունն են, իսկ ոգեշնչման ակունքները՝ հայաշունչ գաղափարները, որոնք նրա գործերում արտահայտվել են Սասունցի Դավթի, Ծովինարի, Դավիթ-Բեկի, Սայաթ-Նովայի, Ակսել Բակունցի, Թամանցիների և ազգային ուրիշ մեծերի կերպարներում:
Մեծ վարպետությամբ ու հայեցի մտածողությամբ ստեղծված նրա հիասքանչ կտավները նաև համամարդկային հնչողություն ունեն:
Նրա անուրանալի ներդրումը կերպարվեստում նաև այն է, որ նա եղավ թեմատիկ կոմպոզիցիոն ժանրի հիմնադիրը Հայաստանի Հանրապետությունում, որին հետևեցին ուրիշները: Նա խոր ակոս է թողել հայ կերպարվեստում:
Իսաբեկյանի բարձրարժեք արվեստը միշտ էլ եղել է արվեստաբանների ուշադրության կենտրոնում: Նրան են նվիրված բազմաթիվ ստվարածավալ ուսումնասիրություններ, հոդվածներ, մենագրություններ: Հայաստանի Ազգային պատկերասրահը հատուկ սրահ է հատկացրել նկարչի աշխատանքների մշտական ցուցադրման համար:
Էդ.Իսաբեկյանը երկրին ու ժողովրդին մատուցած ակնառու ծառայությունների համար իր երկարամյա վաստակաշատ կյանքի ընթացքում արժանացել է բազմաթիվ մրցանակների ու պարգևների, այդ թվում՝ 2004թ. Ամենայն Հայոց կաթողիկոսի կողմից «Սուրբ Սահակ-Սուրբ Մեսրոպ» շքանշանի, արժանացել է Երևանի պատվավոր քաղաքացու կոչման: Նա նաև «Իգդիր» հայրենակցական միության պատվավոր նախագահն էր:
Երևանի քաղաքապետարանը Էդ.Իսաբեկյանի կենդանության օրոք որոշում է կայացրել ստեղծելու նրա գեղանկարչական աշխատանքների մշտական ցուցադրության սրահ:
Հիանալի մարդու, մեծ արվեստագետի ու քաղաքացու հիշատակը միշտ վառ կմնա ժողովրդի, նրա լուսավոր արվեստի բոլոր երկրպագուների սրտերում: