Ապրիլի 20-ից փակ են Երևանի քաղաքապետարանի «Հայ-Արտ» մշակութային կենտրոնի՝ շուրջ 1 տարի առաջ վերանորոգված առաջին հարթակի դռները, ուր քաղաքապետի որոշմամբ պետք է կազմակերպվեր Էդուարդ Իսաբեկյանի աշխատանքների մշտական ցուցահանդես՝ որդու և հարսի ջանքերով: Իսկ «Հայ-Արտի» աշխատակազմը ժամանակավորապես հանգրվանել է Մամուլի շենքում և չի դադարեցրել իր գործունեությունը: Հիշեցնենք, որ հենց «տնվորային» կարգավիճակում կենտրոնը քաղաքապետարանի ճեմասրահում իրականացրեց ավիավթարի զոհերի հիշատակին նվիրված բարեգործական ցուցահանդես-ակցիան:
Պարզելու համար, թե ինչու է ուշանում հոր՝ Էդուարդ Իսաբեկյանի ցուցահանդեսի բացումը, դիմեցինք Գեղարվեստի ակադեմիայի ռեկտոր Արամ Իսաբեկյանին: «Քաղաքապետարանը դեռ գործեր ունի այնտեղ անելու.ոչինչ պատրաստ չէ, կախիչներ չկան, ահագին բան չկա, միայն պատերն են վերանորոգված: Էնպես որ, դա ինձնից չի կախված, այլ քաղաքապետ Երվանդ Զախարյանի ցանկությունից»,- պատասխանեց պրն Իսաբեկյանը: Նրանց զայրացրեց նկարիչների շրջանում վերջերս շրջանառվող այն դիտարկումը, թե ցուցասրահի բացումն ուշանում է այն պատճառով, որ Իսաբեկյան ընտանիքը քաղաքապետարանին պատրաստվում է նվիրել ոչ թե Էդ.Իսաբեկյանի աշխատանքների օրիգինալները, այլ պատճենները: «Էլի ուզում եք մի վատ բան գրել: Այդ լուրերը բամբասանքներ են: Էդտեղ («Հայ-Արտում» — Գ.Հ.) լինելու է Էդուարդ Իսաբեկյանի թանգարան, որտեղ ցուցադրվելու են նրա նկարները: Ես երբեք Էդ.Իսաբեկյանի նկարները կոպիա չեմ արել, իսկի իմ նկարների համար ժամանակ չունեմ»,- բորբոքվեց նկարչի նկարիչ որդին:
Կապվեցինք նաև Իսաբեկյանի հարսի՝ Իրինա Իսաբեկյանի հետ, որը վերջերս նշանակվել է «Հայ-Արտի» կազմում գործող Իսաբեկյանի ցուցասրահի բաժնի պետ: Հարցին՝ ինչու՞ շուրջ մեկ ամիս կողպված են «Հայ-Արտի» առաջին հարթակի դռները և ե՞րբ ենք հնարավորություն ունենալու դիտել ճանաչված նկարչի աշխատանքները, տիկ.Իսաբեկյանը պատասխանեց. «Այո, ես տնօրենն եմ, բայց քաղաքապետարանը պիտի ներսը պատրաստի, գազիֆիկացնի, անհրաժեշտ պայմաններ ստեղծի: Շենքը սառն է ու խոնավ նույնիսկ ամառվա շոգին, մնիչև ջեռուցում չլինի՝ նկարներ չենք կարող կախել: Դիմել ենք փոխքաղաքապետ Արման Սահակյանին ու դեռ պատասխանի ենք սպասում»:
Փոխքաղաքապետ Արման Սահակյանը «Առավոտին» ասաց, որ քաղաքապետարանը իր մասով վաղուց ավարտել է ցուցասրահի հետ կապված բոլոր աշխատանքները, իսկ մնացածն արդեն Իսաբեկյանների խնդիրն է: Նա նաև տեղեկացրեց, որ քաղաքապետարանը մեկ տարի առաջ ավարտել է առաջին հարթակի վերանորոգման աշխատանքները: Վերջապես լուծվել է նաև «Հայ-Արտի» կոյուղագծերի հարցը, խնդիր, որը մշակութային կենտրոնի ստեղծման օրվանից մինչև վերջերս առկախ էր: «Այնտեղ արդեն նորմալ վիճակ է, մնում է բերել նկարները ու կախել: Ինչ վերաբերում է կենտրոնի գազիֆիկացմանը, այդ աշխատանքների համար էլ գումար է հատկացված, սակայն չեմ կարծում, թե այս շոգին այնտեղ գազիֆիկացումը խիստ անհրաժեշտ է»,- ասաց Ա.Սահակյանը: Փոխքաղաքապետից փորձեցինք ճշտել՝ ի վերջո դա Էդուարդ Իսաբեկյանի ստեղծագործությունների ցուցասրա՞հ է լինելու «Հայ-Արտի» կազմում, թե՞ առանձին թանգարան, ինչպես պնդում են Իսաբեկյանները: Փոխքաղաքապետը պարզաբանեց. «Դա, ըստ էության, ցուցասրահ է, որտեղ կներկայացվեն Իսաբեկյանի աշխատանքները: Բացի այդ, Էդուարդ Իսաբեկյանը դեռ ողջ է, իսկ թանգարանում պահվում են ոչ միայն արվեստագետների գործերը, այլև նրանց պատկանող ամեն ինչ: Ի դեպ, եթե մյուս անվանի նկարիչներն ու քանդակագործներն էլ ցանկություն հայտնեն «Հայ-Արտում» ցուցադրվել, նրանց ևս կընդառաջենք»:
«Առավոտը» հարկ համարեց նաև «Հայ-Արտ» մշակութային կենտրոնի տնօրեն Ռիտա Շառոյանից պարզաբանում ստանալ խնդրի առնչությամբ:
«2006- ապրիլի 20-ից Իրինա Իսաբեկյանը նշանակվել է Էդուարդ Իսաբեկյանի ցուցասրահի բաժնի պետ: Նրա վրա է դրված ցուցասրահի և ցուցադրության պահպանության ու անվտանգության հսկողությունը, ինչպես նաև նյութատեխնիկական պատասխանատվությունը: Այդ օրվանից «Հայ-Արտի» աշխատակազմը, որ գործում էր առաջին հարթակի փոքրիկ աշխատասենյակում, ազատեց տարածքը, որպեսզի օր առաջ լուծվեն ցուցադրության կազմակերպական աշխատանքները: Ես, իբրև «Հայ-Արտի» տնօրեն և Էդուարդ Իսաբեկյանի արվեստի երկրպագու, շահագրգիռ եմ այդ ցուցահանդեսի կազմակերպմամբ: Մանավանդ միշտ էլ ամերիկյան «Հորիզոն» հեռուստաընկերության եթերից սփռվող իմ բազմաթիվ հեղինակային հեռուստահաղորդումներով ու «Անդրադարձ» թերթի իմ հրապարակումներով հավաստել եմ ջերմ վերաբերմունքս Էդուարդ Իսաբեկյանի անձի ու արվեստի հանդեպ: Երախտագիտությունս եմ հայտնում Երևանի քաղաքապետին, որի պատրաստակամության արդյունքում է այդ հարթակն այսօր պատրաստ շահագործման: Մնում է, որ Իսաբեկյան ընտանիքն էլ իր հերթին հնարավորինս արագացնի ցուցահանդեսի բացումը և արվեստասեր հասարակությանը վերջապես հնարավորություն ընձեռնվի մոտիկից շփվել սիրված նկարչի արվեստի հետ»,- «Առավոտին» ասաց տիկ.Շառոյանը:
Հակոբյան Գ. – Ինչու՞ են Իսաբեկյաններն ուշացնում ցուցահանդեսը – թերթ, «Առավոտ», Ե., 25.05.2006
Posted on Սպտ 28, 2015 in Uncategorized