Մի քանի հարյուրից ավելի արվեստասերներ, ՀՀ փոխնախագահ Գագիկ Հարությունյանը, մշակույթի նախարար Հակոբ Մովսեսը, բարձրագույն կրթության և գիտության նախարար Վարդգես Գնունին նոյեմբերի 5-ին հետաքրքրությամբ ծանոթացան ժողովրդական նկարիչ, պրոֆեսոր Էդուարդ Իսաբեկյանի ստեղծագործությունների անհատական ցուցահանդեսին, որը նվիրված էր նրա ծննդյան 80-ամյակին: Հայաստանի ազգային պատկերասրահում բացման հանդիսավոր արարողության ժամանակ վաստակաշատ արվեստագետին ջերմ խոսք ասացին պատկերասրահի փոխտնօրեն Հասմիկ Հարությունյանը, Հայաստանի նկարիչների միության նախագահ Պողոս Հայթայանը, նկարիչներ Գրիգոր Խանջյանը, Սարգիս Մուրադյանը, Գրիգոր Աղասյանը, գրող Գևորգ Դերիկյանը, ակադեմիկոս Գևորգ Ղարիբջանյանը:
Ելույթ ունեցողները նշեցին, որ Է.Իսաբեկյանի ստեղծագործությունը ահա արդեն կես դար է, ինչ ուրույն տեղ է գրավում հայ կերպարվեստում, յուրահատուկ ճամփա նշելով մեր պատմական նկարչության մեջ: Շուրջ երկու տասնամյակ լինելով Հայաստանի պետական պատկերասրահի տնօրենը, նա մեծ աշխատանք է տարել ազգային արժեքների հավաքման, դրանց պահպանման ու ցուցադրման ուղղությամբ: Որպես Երևանի գեղարվեստական ինստիտուտի դասախոս Իսաբեկյանը դաստիարակել է Հայ նկարիչների մի քանի սերունդների, որոնց անունները այժմ լայն հնչեղություն ունեն միջազգային ասպարեզներում:
Այնուհետև շնորհակալության խոսք ասաց հոբելյարը, բոլորին հրավիրելով դիտելու չորս սրահներում ներկայացրած իր հարյուրից ավելի ստեղծագործությունները, որոնց երթը գլխավորում են դասական դարձած «Պատասխան Հազկերտին» ու «Պատանի Դավիթը» մեծածավալ կտավները, հասնելով մինչև 1994 թվականին գունամատիտով արված կոմպոզիցիաները: