Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!

Հանդիպումներ Հալեպում

Posted on Սպտ 25, 2015 in Uncategorized

Հալեպի արվեստասեր հասարակայնությունը գեղանկարչության հետ շփվելու անկրկնելի պահեր ապրեց, այցելելով Հայաստանի Ժողովրդական նկարիչ Էդուարդ Իսաբեկյանի ստեղծագործությունների ցուցահանդեսը, որը բացվել էր «Արամ Մանուկյան» ժողովրդական տան «Լևոն Շանթ» սրահում: Բերիո թեմի առաջնորդ Սուրեն արքեպիսկոպոս Գաթարոյանի հովանավորությամբ այն կազմակերպվել էր համազգայինի Հայ երիտասարդաց միության վարչությունը: Հեղինակը փոխադրության անհարմարություններից ելնելով, Սիրիա էր տարել համեմատաբար փոքրածավալ գեղանկարչական և գրաֆիկական թերթեր, որոնք սակայն չնվազեցրին հետաքրքրությունը նրա արվեստի հանդեպ:

Բացման հանդիսավոր արարողության ժամանակ Սուրեն արքեպիսկոպոս Գաթարոյանը ողջունել է արվեստագետին, նշել այն մեծ դերը, որ ունի Իսաբեկյանի ստեղծագործությունը հայ պատմական նկարչության մեջ, խոսել այն ջերմ հայրենասիրության մասին, որով առատ լույսի պես ողողված են նրա նկարները:

Շնորհակալության խոսքով դիմելով ներկաներին, նկարիչը մասնավորապես արտահայտել է իր համակրանքն ու ջերմ զգացումը արաբ ժողովրդի, նրա մշակույթի հանդեպ:

Այդ սերը, իր մեջ արմատավորվել է դեռ փոքրուց, երբ հմայված-տարված է եղել «հազար ու մեկ գիշերների» հեքիաթներով: Իսկ հետագայում, երբ իրերի բերումով ծանոթացել է արաբական ճարտարապետությանը, բազմապատկվել է իր հիացմունքն այդ բարի, հյուրընկալ ժողովրդի նկատմամբ: Չեմ ուզում հայացք գցել պատմությանը, բայց հայ ժողովուրդը շատ բանով է պարտական արաբ ժողովրդին:

-Ես իմ ժողովրդին, նրա պատմությանը նվիրված արվեստագետ եմ, որի փառապանծ էջերն էլ դարձել են իմ շատ ստեղծագործությունների հենքը: Մեր պատմության ընթացքում, ասել է նկարիչը, մենք մեկը մյուսի ետևից դժբախտություններ ու անհաջողություններ ենք տարել, բայց ունեցել ենք և մեր հոգու ընդգրկմանն արժանի երևույթներ: Այո, ունեցել ենք, որովհետև թեև փոքր ենք եղել, կարողացել ենք պահել մեզ, մեր պատիվը: Ահա այդպիսի խոհերով եմ ես ստեղծել «Պատասխան Հազկերտին», «Հաղպատի գյուղացիների ապստամբությունը», «Դավիթները», «Անհանգիստ ձիերը» և մյուս մեծածավալ գործերը, որոնցում, բոլորի մեջ միշտ հնչել է տագնապը: Այո, միշտ տագնապի մեջ ենք եղել, հանգիստ չենք ունեցել: Մենք այսօր էլ անհանգիստ ենք, ունենք բազում բարդ ու դժվարին խնդիրներ, որ պիտի լուծենք բոլոր ասպարեզներում՝ քաղաքականության, տնտեսության, գիտության, մշակույթի:

Անվանի արվեստագետի այցը Հալեպ գտնվել է տեղի հայ համայնքի ուշադրության կենտրոնում: Հալեպի առաջնորդարանի «Գանձասար» պաշտոնաթերթը հարցազրույց է հրապարակել, Է.Իսաբեկյանին անվանելով «Հայ մը, որ ամբողջությամբ հայոց պատմություն կը բուրե: Նկարիչ մը, որուն ավիշը կը սնանի պատմական դրվագներով և վիձինը կը խոսի ժողովրդի ստեղծված կերպարներեն, խորհրդանիշներեն: Մարդը մը, որ դարի ռիթմի ու նորարարության կողքին ընդունված է որպես քնարական նկարիչ»:

Է.Իսաբեկյանը նաև հնարավորություն է ունեցել ծանոթանալու հայ համայնքի կյանքին, շրջագայել Սիրիայում, մասնակցել և ելույթ է ունեցել երևանցի նկարիչների ստեղծագործությունների ցուցահանդեսին: Եվ, ինչպես միշտ, անբաժան է եղել նկարակալից, չնայած տեսողության թուլացմանը, մոտ երկու տասնյակ գրաֆիկական թերթեր է ստեղծել գունամատիտով: Դրանք կոմպոզիցիաներ են, տեսարաններ Եփրատից և այլն:

Այս տարի լրանում է ճանաչված արվեստագետի և մանկավարժի ծննդյան 80-ամյակը: Ցանկանանք նրան քաջ առողջություն և ստեղծագործական նոր հաջողություններ հանուն հայ կերպարվեստի:

Leave a Reply

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով