Հայկական ՍՍՀ ժողովրդական նկարիչ Էդուարդ Իսաբեկյանի կենսական մեծ ուժով, հուզականությամբ և անկեղծությամբ տոգորված արվեստը միշտ էլ հնչում է չափազանց արդիական, համակված է երիտասարդական ավյունով ու կրակով:
Դրա վկայությունն է նրա ստեղծագործությունների անհատական նոր ցուցահանդեսը, որը բացվեց Հայաստանի նկարչի տանը:
-Է.Իսաբեկյանի կյանքը արվեստում լի է վառ ու անմոռանալի հանդիպումներով,-բացելով ցուցահանդեսը, ասաց Հայաստանի նկարիչների միության վարչության նախագահ, Հայկական ՍՍՀ ժողովրդական նկարիչ Ս.Մուրադյանը: — Նա եղել է մեր մշակույթի այնպիսի երախտավորների կրտսեր բարեկամն ու ժամանակակիցը, ինչպիսիք են Ակսել Բակունցն ու Դերենիկ Դեմիրճյանը, Մարտիրոս Սարյանն ու Հակոբ Կոջոյանը, Բաժբեուկ-Մելիքյանը…արվեստի ու գրականության գործիչների մի փայլուն համատեղություն, որն իր խոր հետքն է թողել նկարչի հիշողության մեջ: Նրանց կերպարներին Է.Ի. բազմիցս անդրադարձել է իր ստեղծագործություններում:
1941 թվականին Վրաստանի գեղարվեստի ակադեմիան ավարտած ապագա գեղանկարիչը վերադառնում է Երևան և ամբողջովին նվիրվում հայ կերպարվեստի զարգացման գործին: Հայրենական մեծ պատերազմի տարեգրությանը նվիրված նրա «Դրոշների հանձնումը 89-րդ հայկական դեվիզիային» և «Տանյա» կտավներում դրսևորվեց նկարչի հասուն վարպետությունը: Եվ արդեն 40 տարուց ավելի է, ինչ նկարիչը հետևողականորեն աշխատում է թեմատիկ կոմպոզիցիոն ստեղծագործությունների վրա:
Հայ ժողովրդի պատմությունը դարձավ նրա արվեստի առաջատար թեման, ու նա նկարիչ-քաղաքացու իր դիրքերից սեփական խոսքն է ասում: «Պատասխան Հազկերտին», «Հաղպատի գյուղացիների ապստամբությունը», Դ.Դեմիրճյանի «Վարդանանք» և Ս.Խանզադյանի «Մխիթար Սպարապետ» պատմավեպերի նկարազարդումները մտել են սովետահայ կերպարվեստի պատմահայրենասիրական գործերի ոսկե ֆոնդը:
Ցուցահանդեսի բացման առթիվ վաստակաշատ նկարչին շնորհավորեցին, նրա աշխատանքը բարձր գնահատեցին Հայկական ՍՍՀ կուլտուրայի մինիստրի առաջին տեղակալ Մ.Խարազյանը, արվեստաբան Պ.Հայթայանը:
Նկարչի ծննդյան 70-ամյակի Հայ ֆիլհարմոնիայի փոքր դահլիճում տեղի ունեցավ նրա մեծարման երեկոն: Ճանաչված արվեստագետին ողջունեցին մայրաքաղաքի ստեղծագործական միությունների, մշակույթի օջախների ներկայացուցիչներ:
Երեկոյին ներկա էին Հայկական ՍՍՀ Մինիստրների խորհրդի նախագահի տեղակալ Ռ.Արզումանյանը, ՀԿԿ Կենտկոմի կուլտուրայի բաժնի վարիչ Ս.Ավետիսյանը: