Նախկին քաղաքապետը «տղամարդավարի» չվարվեց. հայ նկարչի ցուցասրահն աչքի առաջ քանդվում է — «armeniasputnik.am», 05.12.2018

Posted on Հնվ 29, 2020 in Uncategorized

      Հայաստանի ժողովրդական նկարչի որդի Արամ Իսաբեկյանը հուսով է, որ Երևանի իշխանությունը կլուծի ցուցասրահի խնդիրը։
       «Էդուարդ Իսաբեկյան» ցուցասրահը կարող էր դառնալ Երևանի ամենալավ ու հետաքրքիր անկյուններից մեկը, բայց քաղաքի նախորդ իշխանությունը` քաղաքապետ Տարոն Մարգարյանի գլխավորությամբ, սրահը ճակատագրի քմահաճույքին էին թողել։ Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ այս մասին ասաց Հայաստանի գեղարվեստի պետական ակադեմիայի ռեկտոր, ՀՀ արվեստի վաստակավոր գործիչ Արամ Իսաբեկյանը։
      Նոր ցուցասրահ ստեղծելու որոշումն ընդունվել է 2004 թվականին, բայց դրա մասին խոսակցություններն ավելի շուտ էին սկսվել։ Սրահը բացվեց 2013 թվականին։ Այսօր ցուցասրահը անմխիթար վիճակում է, տանիքից ջուր է կաթում, պատերը ճաքել են, Իսաբեկյանի ստեղծագործությունները վերացման սպառնալիքի տակ են։
       «Նոր քաղաքապետ Հայկ Մարությանի երդմնակալության ժամանակ այս մասին ասացի նրան։ Հիմա երկրում նախընտրական իրարանցում է։ Հասկանալի է, որ դրա ժամանակը չէ, բայց հուսով եմ, որ հարցը շուտով կլուծվի, ու սրահը վերջապես կվերանորոգվի», – ասաց Իսաբեկյանը։
       Նա խոստովանեց` հայրը դեռ կյանքի օրոք չէր ուզում, որ իր պատվին սրահ բացվի, հավանաբար կանխատեսում էր` ինչ խնդիրների է որդին բախվելու ապագայում։
      Լուրջ խոչընդոտներ հաղթահարելուց հետո 2013 թվականին վերջապես հաջողվեց ցուցասրահ բացել։ Առաջին իսկ ձմեռվա ընթացքում պարզվեց, որ տանիքը վերանորոգման ու ամրացման կարիք ունի, բայց մինչև հիմա ոչինչ չի արվել այդ ուղղությամբ։ Արամ Իսաբեկյանն ընկերների հետ գումար է հավաքել, վերանորոգման որոշ աշխատանքներ է արել, բայց խնդիրը չի վերացել։
      «Դա տղամարդավարի չէ», – ասաց նա` խոսելով Երևանի նախկին իշխանության մասին։
      Իսաբեկյանը նշեց, որ նախկին քաղաքապետը հպարտանում էր Հայաստանի ժողովրդական նկարչի ձեռքբերումներով, բայց գործնականում ոչինչ չի արել ցուցասրահի փրկության համար։
       «Հիմա նոր իշխանությունների գալուն պես մոտս հույս է առաջացել, որ այդ սրահի հարցը կլուծվի», – ասաց նա։
        Էդուարդ Իսաբեկյանը (1914 — 2007) Հայաստանի ժողովրդական արտիստ է, պետական մրցանակների դափնեկիր։

https://armeniasputnik.am/culture/20181205/16050897/armenia-aram-isabekyan.html

Leave a Reply

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով