Հանրապետության նկարիչների ավագ սերնդի վարպետներից մեկի՝ պրոֆեսոր Էդուարդ Իսաբեկյանի ստեղծագործությունները տեղ են գտել նրա անհատական ցուցահանդեսում, որն ուղղարկվել է Մարոկոյի մայրաքաղաք: Ռաբաթում սովետական մշակութային կենտրոնի այցելուները կդիտեն կեսդարյա ստեղծագործության տարիներին Հայաստանի ժողովրդական նկարչի կերտած մոնումենտալ և հաստոցային կտավները: Առանձնակի հետաքրքրություն են ներկայացնում մասնավորապես ժողովրդի պատմական անցյալին և հայրենի երկրի այսօրվա բարգավաճմանը նվիրված աշխատանքները, բազմաթիվ դիմանկարներ, բնանկարներ, նատյուրմորտներ:
Ցուցահանդեսը կազմակերպել է բարեկամության սովետական ընկերությունների միությունը և արտասահմանյան երկրների հետ բարեկամության ու մշակութային կապի հայկական ընկերությունը:
Արմենպրես