«Հայաստան» հրատարակչությունը վերջերս լույս ընծայեց Էդուարդ Իսաբեկյանի՝ Վարդանանց հերոսամարտը պատկերող գրաֆիկական 14 գործերի հավաքածուն:
Դա լավ նվեր է Դ.Դեմիրճյանի ծննդյան 100-ամյակին:
Հանրապետության ժողովրդական նկարիչ Է.Իսաբեկյանին դեռևս տասնամյակներ առաջ ոգեշնչել է մեր ժողովրդի պատմության ամենադրամատիկ դրվագներից մեկը՝ Վարդանանց հերոսամարտը:
Դ. Դեմիրճյանի «Վարդանանք» պատմավեպի նկարազարդում (Զոհրապի մահը). 1952, թուղթ, մատիտ, ածուխ, ռետուշ, 47×36 (ՀԱՊ)
Հինգերորդ դարի պատմիչ Եղիշեի պատմությունը և Դ.Դեմիրճյանի «Վարդանանք» պատմավեպը ներշնչեցին նկարչին՝ ցույց տալու ժողովրդի հերոսական կերպարը: Նկարչի մտորումները նախ իրականացան երկու էսքիզներով: Ապա Դեմիրճյանի վեպին ծանոթանալու առաջին արդյունքը եղան մի շարք մատիտանկարներ. Արտաշատի ժողովն ու Ավարայրի ճակատամարտը պատկերող մասսայական տեսարաններին ավելացան Վարդան Մամիկոնյանի, Վասակ Սյունեցու և Ղևոնդ Երեցի կերպարները: Պատմավեպի երկրորդ հրատարակության նկարազարդման համար Իսաբեկյանն ստեղծեց նոր շարք, ուր կենտրոնական տեղ էին գրավում «Պատասխան Հազկերտին» և «Ավարայրի ճակատամարտը» մեծադիր կտավները:
Ժողովրդական նկարիչը վերջակետ չդրեց սիրած թեմային: Դեմիրճյանի «Վարդանանք»-ի ռուսերեն հրատարակությունն առիթ եղավ, որ նա կրկին անդրադառնա 5-րդ դարի ազատագրման շարժմանը: