Եղբայրական Վրաստանի մայրաքաղաք Թբիլիսիի պատկերասրահում բացվել էր Հայկական ՍՍՌ ժողովրդական նկարիչ Էդ.Իսաբեկյանի ստեղծագործությունների ցուցահանդեսը: Վրաց արվեստասեր հասարակայնությունը հնարավորություն ունեցավ ծանոթանալու ինքնատիպ, խոհերի և խորհուրդների իր ուրույն աշխարհն ունեցող ստեղծագործողի հետ:
Վրացական մամուլը մի առանձին հարգանքով անդրադարձավ այդ ցուցահանդեսին, բարձր գնահատելով Էդ.Իսաբեկյանի ստեղծագործությունները՝ «Լիտերատուրուլի Սաքարթվելո» (Գրական Վրաստան) թերթում Մորիս Փոցխիշվիլին գրում է.
«Ընդվզող ու անհանգիստ թափ, անմիջականություն, պոետական աչք ու ասպետական հոգի, այս տվյալները Էդ.Իսաբեկյանին դարձրել են անչափ ինքնատիպ մի նկարիչ: Նրա ներկապնակը հարստացրել ծիածանի բազմերանգությամբ ու ծովի խորությամբ: Նրա երանգը եթերային է ու թափանցիկ, գիծը՝ թրթռուն ու համարձակ, նրա միտքը բարդ է միաժամանակ զարմանալիորեն հստակ ու կայծկլտուն:
Առաջին հերթին աչքի է ընկնում նկարչի գործերի ազգային կոլորիտը, ազգային բնույթը: Ձեր առջև կանգնած է մի իսկական հայ նկարիչ, հայ ոչ միայն իր թեմատիկայով, այլև ոճով, երանգապնակով և ինչ-որ անորսալի, օրգանական ինքնությամբ…Ահա թե ինչու է նա այդքան հմայիչ, հետաքրքիր ու հարազատ նաև մեզ, վրացիներիս համար:
Տաղանդավոր արվեստագետը բերում է հնագույն, սակայն միաժամանակ նոր, ուրույն մի աշխարհ, և ձեր առջև երկարում է նոր մարդկանց կերպարների, ժայռերում փորված գյուղերի, ժամանակի անգութ ձեռքով ավերված բերդերի ու վանքերի անվերջանալի մի քարավան, որն անցնելով կյանքի ու մահու բազմաբղետ ճամփաներով՝ անմահության վսեմ իրավունք է ձեռք բերել…»:
Այնուհետև հեղինակը հիացմունքով է խոսում «Պատասխան Հազկերտին» ծավալուն, կամք ու հավատ ներշնչող կտավի, Ակսել Բակունցի, Կոնստանդին Գամսախուրդիայի, Սայաթ-Նովայի դիմանկարների, ինչպես նաև դաշտանկարների, պատմաթեմատիկ ժանրի զանազան գործերի, ջրաներկ աշխատանքների, ճեպանկարների և էսքիզների մասին:
Վրացական ժողովրդական նկարիչ Ուզա Ջափարիձեն ցուցահանդեսի եզրափակման ժամանակ նշեց, որ Էդ.Իսաբեկյանը արվեստագետի հմտությամբ կարողացել է պատկերել հոգու այն մեծությունն ու խորությունը, որ հատուկ են Հայաստան երկրին ու հայությանը:
Էդ.Իսաբեկյանի այս ցուցահանդեսում ներկայացված ստեղծագործությունների մասին ջերմ ու դրական են արտահայտվել նաև ՍՍՌՄ նկարիչների միության քարտուղար Ռոժդեստվենսկին, Վրաստանի գեղարվեստի ակադեմիայի ռեկտոր, վրացական ժողովրդական նկարիչ Ապոլիոն Քութաթելաձեն, Վրացական ՍՍՌ ժողովրդական նկարիչ Կանդելակին և այլն ճանաչված արվեստագետներ: