Արամ Իսաբեկյանի նվերը Երևանին
2013 թ․ մայիսի 3-ին Երևանում մշակութային կենտրոնի առաջին հարթակում արվեստասեր հանրության առաջ իր դռները բացեց ժողովրդական նկարիչ Էդուարդ Իսաբեկյանի մշտական ցուցասրահը: Այն ստեղծելու գաղափարն ի վերջո կյանքի կոչվեց Էդուարդ Իսաբեկյանի թվով 28 գեղանկարչական կտավների ցուցադրմամբ, որոնք Երևանին է նվիրել նկարչի որդին՝ Երևանի գեղարվեստի պետական ակադեմիայի ռեկտոր, պրոֆեսոր, ՀՀ Արվեստի վաստակավոր գործիչ Արամ Իսաբեկյանը:
Շնորհակալություն հայտնելով քաղաքապետարանին տրամադրած տարածքի համար` Արամ Իսաբեկյանը համոզմունք հայտնեց, որ ցուցասրահը կհամալրի այն հիանալի թանգարանների շարքը, որոնցով այսօր, հիրավի, գեղեցկանում և հարստանում է Երևանը:
— Ինձ համար ավելի թանկ բան չկա, քան իմ հոր աշխատանքները: Համոզված եմ, որ այս ցուցասրահը ժամանակի ընթացքում կվերածվի թանգարանի, որտեղ կցուցադրվեն ոչ միայն նրա նկարները, այլև թողած ահռելի ժառանգությունը, որը ես սիրով կնվիրաբերեմ թանգարանին, – ասաց Արամ Իսաբեկյանը:
